Киев Россия томонига Россия Президенти Владимир Путин ва Украина Президенти Владимир Зеленский ўртасидаги учрашувни август ойи охиригача ўтказишни таклиф қилди. Бу ҳақда Истанбулда Россия Федерацияси билан тинчлик музокараларида қатнашаётган Украина делегацияси раҳбари Рустем Умеров учрашув якунлари бўйича ўтказилган матбуот анжуманида маълум қилди.
Умеровнинг таъкидлашича, Украина доимий равишда етакчилар учрашувини ёқлаб келади. “Биз бунга кеча тайёр эдик. Бугун тайёрмиз. Эртага эса тайёр бўламиз. Бундай учрашув ҳақиқий сиёсий тараққиёт йўлини очиши мумкин. Россия ўз тайёрлигини намойиш қилиши керак”, деди у.
Умеров, Туркияга воситачилик саъй-ҳаракатлари ва музокараларни уюштиргани учун миннатдорчилик билдириб, уни “мулоқот ва тинчлик учун муҳим платформа” деб атади.
Делегация раҳбари Украина маҳбусларни алмашиш масаласида кейинги силжишни кутаётганини таъкидлади.
Унинг сўзларига кўра, учрашув чоғида Россия томони уч йилдан ортиқ асирликда бўлган шахсларни қайтаришга рози бўлган.
Умеровнинг қўшимча қилишича, Россия Федерацияси ва Украина ҳарбий ва фуқаролик маҳбусларни кейинги алмашиш бўйича келишиб олган ва асирларни алмашиш бўйича музокараларнинг янги босқичини ўтказмайди.
“Биз адолатли ва барқарор тинчликка эришиш – бутун халқимизни, жумладан, Россияга ноқонуний депортация қилинган болаларни қайтариш учун музокаралар жараёнини давом эттирмоқдамиз”, деди у.
Украина ҳеч қандай шартларсиз ўт очишни тўхтатишга рози. Бу ҳақда Украина ташқи ишлар вазирлиги вакили Георгий Тихий учрашув якунларини шарҳлаган ҳолда айтиб ўтди, деб хабар беради aa.com.tr.
Дипломатнинг қўшимча қилишича, Россия томони уч йилдан ортиқ асирликда бўлган шахсларни озод қилиш таклифини қабул қилган.
