“Frontiers in Nutrition” (IF=6.7) журналида коронавирусга қарши иммун сути олиш имконияти амалиётда исботлаб берилди.
Натижаларга кўра, ZF-UZ-VAC2001 рекомбинант вакцинаси билан эмланган сигир ва эчкиларда иккинчи дозадан 2 ҳафта ўтиб, уларнинг қон зардобларида нейтралловчи антитаначалар ҳосил бўлиши кўрсатиб берилди.
Нейтралловчи антитаначалар фаоллиги 3-дозадан кейин 21 кун ўтиб (биринчи эмлангандан 77 кун ўтиб) энг юқори фаолликка кўтарилиб, зардоб 120 марта суюлтирилганда ҳам лаборатория тестларида тирик коронавирус кўпайишини тўхтатиши аниқланди.
Нейтралловчи антитаначалар миқдори сутга нисбатан (0,2 мкг/мл) биринчи уч кунлик оғиз сутида (4,08 мкг/мл гача) юқори миқдорда эканлиги ҳамда эмланган она сигир сутидаги нейтралловчи антитаналар сут билан озиқланган бузоқларга ўтиши амалий тажрибада кўрсатиб берилди.
Иммун сути хусусиятлари 62,5 ○С температурада 30 минут давомидаги пастеризация режимида сақланиб қолиши аниқланиб, иммун сутининг терапевтик мақсадларда ишлатиш имконияти очиб берилди.
Қорақалпоғистон Республикасидаги “Panaev Farms” чорвачилик корхонасида коронавирусга қарши фаол нейтралловчи иммун сути (“IMMUNE MILK” бренди остида) пастеризацияланган сут ҳолида кичик ҳажмда ишлаб чиқариш режалаштирилган бўлиб, ҳозирда технологик линиялар синовдан ўтказилмоқда.
Янги технология асосида оғиз сутидан болалар ва катталар учун биологик фаол, тез шимилувчи ва SARS-CoV-2 га қарши нейтраллаштирадиган антитаначалари мавжуд бўлган капсулаларни ишлаб чиқариш устида тадқиқотлар олиб борилмоқда. Бу ҳақида Инновацион ривожланиш вазирлиги ахборот хизмати хабар бермоқда.
