Намойишдан сўнг Қозоғистоннинг Ўзбекистондаги элчиси Сатыбалды Дархан агентлик Бош директори Фирдавс Абдухолиқов, Бош директорнинг биринчи ўринбосари Шуҳрат Ризаев ҳамда фильм постановкачи режиссёри Ҳилол Насимовлар билан суҳбатлашди.
Мазкур суҳбатда қозоғистонлик вакилларга “Мерос” фильми жуда маъқул бўлганлиги, қардош халқларнинг урф-одатлари ва удумлари ўзига хос ракурсларда кўрсатилганлиги, фронтдаги воқеаларнинг таъсирчанлиги алоҳида таъкидланди.
Агентлик Бош директори Фирдавс Абдухолиқов қозоғистонлик элчиларни “Ўзбеккино” МА билан ўзаро ҳамкорликка чорлади. Биринчи ўринда, “Мерос” бадиий фильмини Ўзбекистонда ва Қозоғистонда катта премьераларини ўтказиш таклифини берди. Иккинчи ўринда, ўзаро ҳамкорлик меморандумини имзолаш, унинг доирасида сентябрь ойида ўтказилиши режалаштирилаётган “Ипак йўли дурдонаси” Тошкент халқаро кинофестивалида иштирок этиш, ўзаро ҳамкорликни ривожлантириш орқали кинобозорни такомиллаштириш таклифларини киритди.
Қолаверса, агентлик томонидан ёш киноижодкорларнинг қўллаб-қувватланаётгани, келгусида “Марказий Осиё ёшлар кинофестивали”ни ташкил этиш ва ўтказиш, унда қозоқ ёшлари иштирокини ҳам таъминлаш кераклиги ҳақида фикр билдирилди.
Қозоғистон элчиси барча таклифларни маъқуллаб, ўзаро ҳамкорлик киносаноатнинг ривожланишига таъсир кўрсатишини мамнуният билан таъкидлади.
“Ўзбеккино” Миллий агентлиги Ахборот хизмати
