Тошкент вилояти Экология ва иқлим ўзгариши бош бошқармаси раҳбари бошчилигида ишчи гуруҳ тузилиб, жойига чиқиб ўрганиш ўтказилди, дея хабар беради бош бошқарма ахборот хизмати.
Маълум қилишича, мурожаатга кўра, ишчи гуруҳ тузилиб, зудлик билан воқеа жойига чиқиб ўрганилди.
Ўрганиш давомида фуқаро мурожаатидаги манзил Пискент тумани «Лолариқ» МФЙ «Янги замин» боғдорчилик ва узумчилик ширкати ҳудудида жойлашган «Ш.» фермер хўжалигига қарашли бўлган майдоннинг дала четида ўсиб турган 24 туп тол ҳеч қандай рухсатномасиз кесиб ташлангани аниқланган.
Мазкур ҳолат бўйича фермер хўжалиги раҳбаридан тушунтириш хати олиниб, далолатнома расмийлаштирилган. Табиатга 218 миллион 566 минг сўм зарар етказилгани ҳисоб-китоб қилинган. Ҳолатга ҳуқуқий баҳо бериш учун тўпланган ҳужжатлар Тошкент вилояти прокуратурасига юборилади.
