Адлия вазирлиги ва Қурилиш ва уй-жой коммунал хўжалиги вазирлиги томонидан Тошкент шаҳрида эксперимент тариқасида қурилишга рухсат бериш ва архитектура-режалаштириш топшириғини (АРТ) ишлаб чиқиш давлат хизматлари композит тарзда кўрсатиш бўйича қўшма қарор тасдиқланди.
Мазкур ҳужжатга асосан 2025 йил 15 февралдан бошлаб, қурилишга рухсат бериш ва архитектура-режалаштириш топшириғини ишлаб чиқиш учун зарур бўлган муддатлар ва кўриб чиқиш босқичлари сезиларли даражада қисқартирилди.
Хусусан, умумий муддат 20 иш кунидан 12 иш кунига, кўриб чиқиш босқичлари 11 дан 7 тага қисқартирилди ва йиғим миқдори БҲМнинг 1,5 баравардан 0,5 бараварига туширилди.
Муқаддам мазкур давлат хизматларидан фойдаланиш учун талабгорлар жами 5 маротаба (рухсатнома учун ариза юбориш, рухсатномани олиш, АРТ учун ариза юбориш, АРТ тўловини амалга ошириш ҳамда АРТни олиш) давлат хизматлари марказларига келишлари лозим бўлган бўлса, ҳозирда ушбу рақам 3 маротабагача қисқарди (ЙИДХПдан юборилса келиш шарт эмас).
Бу ўзгаришлар нафақат ортиқча оворагарчиликни, балки вақт ва маблағни тежашга ҳам ёрдам беради. Битта ариза билан қурилишга рухсатнома ва АРТ ҳужжатларини олиш имконияти яратилди.
Эксперимент 2025 йил охирига қадар Тошкент шаҳрида олиб борилади ва натижалари бўйича республика миқёсида жорий қилиш учун Вазирлар Маҳкамасига таклифлар тақдим этилади.
Янги тартиб шаҳар ва республикадаги қурилиш соҳасини янада такомиллаштиришга қаратилган муҳим қадам бўлиб, аҳоли ва тадбиркорлар учун қулайликлар яратишга хизмат қилади.
