Мулоқотда мартабали меҳмон Ўзбекистон халқини мамлакат мустақиллигининг 30 йиллиги билан самимий табриклаб, Ўзбекистон ва Франция ўртасидаги парламентлараро ҳамкорликни янада юқори поғонага кўтариш учун барча имкониятни ишга солишга тайёр эканини билдирди.
Таъкидлаш жоизки, икки томонлама парламентлараро алоқаларни янада ривожлантириш мақсадида 2008 йилда Ўзбекистон Республикаси Олий Мажлиси Сенатида Франция Республикаси Сенати билан ҳамкорлик бўйича парламентлараро гуруҳ тузилди.
Учрашувда ўтган давр мобайнида мамлакатларимиз ўртасидаги дўстона алоқаларнинг фаоллашувида парламентлараро ҳамкорлик муҳим аҳамият касб этиб бораётгани таъкидланди. Хусусан, бугунги кунда Ўзбекистон – Франция ўртасида сиёсий, савдо-иқтисодий, маданий-гуманитар, илмий-техникавий ва бошқа соҳаларда кенг ҳамкорлик алоқалари йўлга қўйилгани, ўз навбатида, бу саъй-ҳаракатлар Ўзбекистон Республикаси Президенти Ш.М.Мирзиёевнинг 2018 йилнинг октябрида Францияга амалга оширган давлат ташрифидан сўнг янги босқичга кўтарилгани қайд этилди.
Шунингдек, икки томонлама ҳамкорликда эришилган натижалар, парламентлараро мулоқотни ривожлантириш масалалари муҳокама қилинди, деб хабар беради Ўзбекистон Республикаси Олий Мажлис Сенати матбуот хизмати.
