Барча аризалар кўриб чиқилди ва гуруҳларга бўлинади. 100 кишидан иборат биринчи гуруҳ 2023 йил 26 июнь куни аэропортга келади. Қолган иштирокчилар тасдиқланган жадвал бўйича экскурсияга келишлари мумкин.
— Биз бунчалик кўп ариза кутмаган эдик. Балким, бу ҳамма учун биринчи очиқ экскурсия бўлгани учундир. Биринчи куннинг ўзида электрон почтага 300 га яқин хат келиб тушган. Бу жуда катта рақам. Лекин биз қабулни тўхтатмадик ва ариза топширган ҳар бир киши учун экскурсия ўтказишга қарор қилдик. Бу битта ёки ҳатто иккита экскурсия бўлмаслиги аниқ эди. Биз илгари ходимларнинг фарзандлари учун шунга ўхшаш тадбирларни ўтказдик ва биламизки, болаларнинг оптимал сони юздан ошмаслиги керак. Шу кунларда барча мурожаатларни саралаб, гуруҳларга бўлиб, жадвални тасдиқладик, — дея изоҳ берди “Uzbekistan Airports” матбуот хизмати.
Ариза юборганларнинг барчасига экскурсия санаси ва вақти, шунингдек, аэропортда тадбирни ўтказиш дастури ва қоидалари кўрсатилган жавоб хати берилади. Экскурсия давомида болаларга рўйхатдан ўтиш жойидан тортиб, багажни самолётга ортишгача бўлган ишлар кўрсатилади. Якуний босқичда самолёт намойиши бўлади — болалар салонга киришлари, багаж бўлимини ва ҳатто экипаж иш жойини кўришлари мумкин бўлади.
