Авваллари метро қурилишида бир суткада 1-1,5 м туннель қазилган бўлса, ушбу лойиҳада кунига 10-12 м туннель қазилиб, тюбинг ўрнатилди. Шу билан бирга, тюбинг ишлаб чиқарувчи завод қайта жиҳозланиб, корхонанинг иш ҳажми кескин оширилди. Қурилиш ишларида нафақат Германия, балки Италия давлатининг жаҳонга машҳур корхоналарида ишлаб чиқарилган замонавий қурилиш техникаларидан ҳам унумли фойдаланилди. 

Марказий Осиёда ягона бўлган 2 та 220 тонналик юкни кўтарадиган занжирли кран, 3 та 70 тонналик юқори аниқликдаги (телескопик) автокран, ишлаб чиқариш қуввати соатига 20 ва 40 куб метрни ташкил этувчи мобил бетон заводлари, металлопрокатга ишлов берувчи 14 та қурилма, иккита ўта оғир, 350 тонналик юкларни ташувчи автоулов ҳамда қурилиш қозиқлари қоқадиган ва бурғилаш ускуналаридан ер ости бекати ҳамда линияларини қуришда унумли фойдаланилди. 

Тошкент метрополитени Юнусобод йўналишининг 7,6 км узунликдаги биринчи босқич қурилиши 10 йил давом этган бўлса, 2,9 км узунликдаги иккинчи босқич қурилиши қарийб 2 йилда тугалланди. 

Аҳамиятлиси, Президентимизнинг мазкур масалага реал ёндашуви ва белгилаб берган муҳим вазифалари бўйича олиб борилган тизимли ишлар натижасида сўнгги йилларда пойтахт аҳолисининг кун сайин ўсиб бораётгани ва автотранспортлар оқимининг кескин кўпайиши натижасида пойтахт ва унга туташ йўлларда ҳосил бўлаётган катта-катта тирбандликлар олди олинишига хизмат қилувчи жамоат транспорти тизимининг муносиб концептуал ечими юзага келди.

Тошкент ер усти ҳалқа метро линиясининг биринчи босқичи бўлган «Дўстлик-2 – Қўйлиқ» йўналиши қуриб битказилиб, фойдаланишга топширилгани истиқлол шодиёнаси арафасида юртдошларимизга яна бир муносиб байрам туҳфаси бўлди. Метронинг ушбу участкасида 7 та бекат барпо этилган. Янги йўналишнинг узунлиги 11,5 километр.

Эътиборлиси, аҳолининг талаб ва эҳтиёжлари, пойтахтимизнинг келгуси ривожланиши инобатга олиниб, Тошкент шаҳрида қурилаётган ер усти халқа метро линияси Марказий Осиёда ягонадир. 

Лойиҳа беш босқичда амалга оширилмоқда. Умумий узунлиги 54,8 километр, 35 та метро бекати, 2 та депо ва 1 та техник кўрик пункти қурилади. 2019 йилнинг август ойида Тошкент ҳалқа метро линиясининг биринчи босқичи бўлган “Дўстлик-2 – Қўйлиқ” линиясида 2 минг 303 метрлик янги рельслар ётқизилиб, дастлабки поездлар синов тариқасида ҳаракатланган эди.

Ушбу йўналиш қурилишида жами 341 дона таянч устуни, 341 дона темир бетон ригеллар ва ҳар бирининг узунлиги 26 метр бўлган 2 минг 73 дона балка ўрнатилган.