Маълум қилинишича, жорий йил 5 март куни бир неча вояга етмаган шахслар ўртасида оғзаки жанжал келиб чиққан. Жанжал вақтида улардан бири ошхона пичоғи билан жабрланувчининг ўнг ва чап кўкрак қисмига жароҳат етказган.
Жабрланувчи шифохонага олиб борилган, бироқ кўрсатилган тиббий ёрдамга қарамасдан вафот этган.
Мазкур ҳолат юзасидан Жиноят кодексининг 97-моддаси (қасддан одам ўлдириш) билан жиноят иши қўзғатилган. Пичоқ билан жароҳат етказганликда гумон қилинган вояга етмаган шахс ушланган.
Бош прокуратура маълумотига кўра, ушбу жиноят иши доирасида жами 5 нафар вояга етмаган гумонланувчига нисбатан «қамоққа олиш» тарзидаги эҳтиёт чораси қўлланилган.
Ҳозирда ҳолат юзасидан тергов ҳаракатлари олиб борилмоқда.
