“Societe des Produits Nestle S.A.” (Швейцария) компанияси 2018 йилда “48 копеек” товар белгисига муҳофаза ҳужжати олган “А.B.”МЧЖга (Ўзбекистон) берилган тегишли гувоҳномани ҳақиқий эмас, деб топиш ҳақида ариза билан мурожаат қилади.
Адлия вазирлиги ҳузуридаги Апелляция кенгашига тақдим этилган ҳужжатларни ўрганиш натижасида шу нарса аниқландики, Nestle компанияси гуруҳи 1996 йил июнь ойида “Нестле Жуковское мороженое” МЧЖдан акциялар пакетини ҳарид қилади. Шу вақтнинг ўзида компания Россия ҳудудида “48 копеек” товар белгисини рўйхатдан ўтказиб, муҳофаза ҳужжатини олади. Бундан кўриниб турганидек, Nestle компанияси товар белгисига бўлган ҳуқуқни анча олдин қўлга киритгани маълум бўлади. Демак, халқаро нормалар ва миллий қонунчилик талабларига кўра, товар белгисини биринчи рўйхатдан ўтказган юридик шахс унга эгалик қила олади.
Апелляция кенгашининг холис ва қонуний қарорига биноан адолат қарор топди ва товар белгисига бўлган ҳуқуқ ҳақиқий эгасига қайтарилди. Эндиликда, истеъмолчи турли тадбиркор томонидан ишлаб чиқарилган бир хил номдаги маҳсулотни кўриб адашмайди, тадбиркорлар эса ўз манфаатлари, компания имижи учун курашиб сарсон бўлмайди.
Алоҳида таъкидлаш лозимки, “Nestle Uzbekistan” МЧЖ 2000 йилдан бугунги кунга қадар 60 миллион АҚШ долларига яқин инвестиция киритган ва бу кўрсаткич янада ошиши режалаштирилмоқда. Албатта, юртимизда қонунларни барча учун бирдай амал қилиши жамият равнақи, чет эл вакиллари ишончининг янада ортишига хизмат қилади.
