Мамлакатимизда гидроэнергетика соҳасида изчил ислоҳотларни амалга ошириш, тизимда эришилаётган натижалар ҳамда йирик, ўрта ва микро гидроэлекторстанцияларни лойиҳалаштириш, янги гидроэлекростанциялар қуриш ва ишлаб турганларини модернизация қилиш бўйича қатор ишлар амалга оширилмоқда.
Юртимизда гидроэнергетика соҳасини ривожлантириш учун табиий шароитларга эга ҳудудлар кўп. Бу имкониятдан самарали ва оқилона фойдаланган ҳолда қайта тикланувчи электр энергия ишлаб чиқаришни кўпайтириш иқтисодиётимизнинг энг муҳим йўналишларидан бирига айланди.
Ўзбекистон Республикаси Президентининг 2017 йил 17 октябрдаги “Тўпаланг дарёсида Зарчоб кичик ГЭСларини қуриш” инвестиция лойиҳасини амалга оширишга доир чора-тадбирлар тўғрисида”ги қарори доирасида Cурхондарё вилояти Сариосиё туманида янгидан барпо этилаётган Зарчоб-1 кичик ГЭС ва Зарчоб 220/110/10 кВ подстанция қурилди.
Бу объектдаги қурилиш ишлари 2017 йилнинг август ойида бошланган эди. ГЭС учун зарурий технологик қурилмалар, асбоб-ускуналар Хитойнинг ушбу йўналишдаги етакчи компанияси “Dongfang Electric International Corporation” томонидан етказиб берилди. Бу ерда 2 та гидроагрегат ўрнатиш белгиланган бўлиб, уларнинг умумий қуввати 37,4 МВт ни ташкил этади.
“Ўзэнергоинспекция” махсус ишчи гуруҳи ва Сурхондарё ҳудудий бўлими мутахассислари томонидан мазкур Зарчоб-1 кичик ГЭС ва Зарчоб 220/110/10 кВ подстанциянинг қурилиш-монтаж ишларини техник кўрикдан ўтказилди. Чуқур таҳлилий ўрганишлар жараёнида аниқланган камчиликлар юзасидан тегишли тавсия ва кўрсатмалар берилди.
“Ўзэнергоинспекция” Матбуот хизмати
