Туркия Президенти Режеп Таййип Эрдоған парламентга мазкур мамлакатнинг аъзо бўлишини маъқуллаш тўғрисидаги баённомани тақдим этганидан кейин Стокгольмнинг Шимолий Атлантика иттифоқига кириши йўлидаги асосий тўсиқ ҳозирда Венгрия бўлиб турибди.
Бош вазир Виктор Орбан бошчилигидаги ҳукмрон Фидес партияси парламентда мутлақ кўпчиликни ташкил этади ва Швеция сиёсатчилари Венгриядаги демократия ҳолати ҳақида гўёки “тўғридан-тўғри ёлғон” гапираётганини рўкач қилиб, 2022 йил июлидан бери Швеция номзодини тўхтатиб туришда давом этмоқда, деб хабар беради korrespondent.net.
Швеция 2022 йилда НАТОга аъзо бўлиш учун ариза топширган эди. Ўшандан бери у Венгрия ва Туркиядан ташқари НАТОга аъзо барча давлатлар томонидан ратификация қилинган. 23 октябрь куни Туркия Президенти Режеп Таййип Эрдоған Швециянинг НАТОга кириши ҳақидаги баённомани имзолади.
НАТО бош котиби Йенс Столтенбергнинг айтишича, Швеция альянсга тўлақонли аъзо бўлиш учун барча шартларни бажарган. Унинг фикрича, мамлакат 28-29 ноябрь кунлари бўлиб ўтадиган альянс ташқи ишлар вазирларининг йиғилишидан “кечикмасдан” НАТОга аъзо бўлиши керак.
