Қуруқликдаги энг катта ҳайвонлар қаторига кирувчи “Paraceratherium linxiaense” деб номланган янги турнинг вазни олтита Африка филининг оғирлигига тенг экани, бўйи эса жирафадан баландроқ эканлиги аниқланди.
Тахминларга кўра, шохсиз сут эмизувчи бўлган ушбу янги турнинг бўйи 7, узунлиги 8 метргача бўлган.
Хитойнинг Пекин шаҳридаги умуртқали ҳайвонлар палеонтология институти доктор Дэн Тао бошчилигидаги тадқиқотларда каркидоннинг бош ва жағ суяги тўлиқ сақланиб қолгани аниқланди.
Гигант каркидоннинг тумшуқ тузилиши чўчқага ўхшаш ўтхўр сут эмизувчилар синфига мансуб тапир (Осиё ва Африканинг тропик минтақаларида яшовчи калта хартумли, йўқолиб кетиш хавфи остида бўлган ҳайвон)га ўхшайди.
Олимлар янги кашф этилган тур Покистонда яшаган улкан каркидонлар билан боғлиқлигини аниқлашди. Бу эса шуни кўрсатадики, каркидон турлари бутун Марказий Осиё бўйлаб ҳаракатланган.
Гигант каркидон турларининг шимоли-ғарбий Хитой ва Ҳиндистон ярим ороли оралиғида эркин ҳаракатлана олгани Тибет платосида илгари денгиз сатҳи баландлигидаги текисликлар мавжуд бўлган, деган фикрни тасдиқлайди.
