Конфронсро вазири маориф ва илми Ҷумҳурии Тоҷикистон Р.Саидзода ифтитоҳ намуда, онро натиҷаи имкони фароҳам овардани муколама миёни зиёиёни илмии кишварҳои мо арзёбӣ намуд. Р.Саидзода қайд кард, ки чорабинии имрӯза дар доираи панҷумин Шӯрои машваратии сарони давлатҳои Осиёи Марказӣ баргузор шуда, аз ҷумла, ин ташаббус аз ҷониби Президенти Ҷумҳурии Ӯзбекистон ва баъдан аз ҷониби ректорони мамлакатҳои Осиёи Миёна ба миён гузошта шудааст.

Дар навбати худ, вазири илм ва таҳсилоти олии Ҷумҳурии Қазоқистон С.Нурбек қайд кард, ки раванди имрӯзаи ҷаҳонишавӣ ва замони тағйироти сиёсӣ имкони табдил додани минтақаи Осиёи Марказӣ ба «хаб»-и таълимӣ мебошад.

Муовини вазири маориф, илм ва инноватсияи Ҷумҳурии Ӯзбекистон С.Бузрукхонов дар бораи ислоҳот дар соҳаи таҳсилоти олии Ӯзбекистон суханронӣ кард. Вай ҳамчунин пешниҳод кард, ки масъалаи ташкили вохӯрии вазирони маориф ва ректорони “Иттиҳоди Аврупо – Осиёи Марказӣ” дар Ӯзбекистон соли оянда баррасӣ шавад.

Иштирокчиёни форум бо маърӯзаҳои худ дар ду ҷаласаи кории Форум – «Тамоюлҳои таҳсилоти байналмилалӣ дар ҷаҳони тағйирёбанда: анъанаҳо ва инноватсияҳо» ва «Рушди ҳамкориҳои илмию педагогӣ ҳамчун омили ҳамгироии байналмилалӣ дар фазои таҳсилоти гуногунфарҳангӣ» иштирок намуданд.

Дар суханронии раҳбарони донишгоҳҳо ҷанбаҳои муҳими ҳамгироии низоми таҳсилоти олии кишварҳои Осиёи Марказӣ ба фазои таҳсилоти ҷаҳонӣ, стратегияҳои ҳамкориҳои байни донишгоҳҳо, фароҳам овардани лоиҳаҳои муштарак ва муваффақияти онҳо таъкид гардид.

Бинобар натиҷаҳои музокирот аз ҷониби мактабҳои олии Ӯзбекистон зиёда аз 20 Ёддошти тафоҳум, Созишномаҳо ва «харитаҳои роҳ» ба имзо расидаанд, ки соҳаҳои гуногунро дар бар мегиранд.

Дар доираи конфронс вохӯрии ректорон дар шакли У-2-У (Донишгоҳ-Донишгоҳ) баргузор гардид.