Музокирот аз мулоқот бо вазири сармоягузории Урдун доктор Тариқ Абу Ғазала оғоз ёфт. Ҷонибҳо дурнамоҳои тавсеаи ҳамкориҳои сармоягузориро баррасӣ карда, дар бораи ҷалби сармояи мустақими хориҷӣ ва ташкили муҳити мусоиди соҳибкорӣ таҷриба иваз карданд.
Сипас музокирот бо вазири саноат, савдо ва таъминоти Урдун Яруб Кудаҳ баргузор шуд. Масъалаҳои зиёд кардани ҳаҷми гардиши мол, барқарор намудани робитаҳои мустақим миёни доираҳои тиҷоратии ду кишвар, ҳамкориҳои саноатӣ ва мубодилаи таҷриба дар соҳаи дастгирии содирот баррасӣ гардиданд. Дар натиҷаи вохӯрӣ ҷонибҳо ба омодасозии Созишнома оид ба тиҷорати имтиёзнок миёни Ӯзбекистон ва Урдун мувофиқа карданд.
Дар доираи сафари мазкур ҳамчунин вохӯриҳо бо вазири иқтисоди рақамӣ ва соҳибкорӣ Самим Смейрат, директори генералии Парки тиҷоратии ба номи Подшоҳ Ҳусейн Аммар Иззиддин, раиси Палатаи саноатии Урдун муҳандис Фатҳӣ Ҷагбир ва роҳбарони ширкатҳои пешбари кишвар, аз ҷумла National Arab Mining Company, Zarhat Company, Arab Pesticides and Veterinary Drugs Manufacturing Company, Jordan Phosphate Mines Company, Grow Tech ва Classic Fashion Apparel Industry баргузор гардиданд.
Рӯйдоди муҳими рӯз суҳбати "мизи мудаввар" бо иштироки роҳбарияти Палатаи савдо ва саноати Урдун ва беш аз 20 ширкати маҳаллӣ буд, ки соҳаҳои дорусозӣ, кимиё, нассоҷӣ, электротехника, саноати хӯрокворӣ ва дигар бахшҳоро намояндагӣ мекарданд. Ҷомеаи соҳибкории Урдун бо иқлим ва имкониятҳои сармоягузорӣ ва лоиҳаҳои умедбахши Ӯзбекистон шинос карда шуд. Дар натиҷаи муҳокимаҳо самтҳо ва лоиҳаҳои мушаххас барои ҳамкории якҷоя мувофиқа гардиданд.
Сафари ҳайат идома дорад.
