Сарвари кишвари мо ба Пешвои миллии халқи туркман, Раиси Халқ Маслаҳатӣ Гурбангулӣ Бердимуҳамедов, Президенти Туркманистон Сердар Бердимуҳамедов ва мардуми бародари туркман барои ин ҷоизаи баландпояи давлатӣ изҳори миннатдории самимӣ баён намуд.
— Ман ин ҷоизаро ҳамчун нишонаи таваҷҷуҳи махсус ва эҳтироми баланд ба Ӯзбекистон ва халқи бисёрмиллати он, инчунин эътирофи кӯшишҳои муштараки мо ҷиҳати таҳкими муносибатҳои дӯстӣ, ҳамсоягии нек, эътимоди мутақобила ва ҳамкории шарикӣ дар минтақаи Осиёи Марказӣ қабул менамоям, — таъкид кард Сарвари кишвари мо.
Бо қаноатмандӣ сатҳи хеле баланди муносибатҳои шарикии стратегӣ миёни Ӯзбекистон ва Туркманистон, ки ба таҷрибаи ғании таърихӣ, анъанаҳои бародарӣ ва эҳтироми тарафайн такя мекунанд, қайд гардид.
Дар солҳои охир лоиҳаҳои муҳимми иқтисодӣ ва башардӯстона амалӣ шуда, ҳаҷми савдои дуҷониба ва миқёси ҳамкорӣ ба таври назаррас афзоиш ёфтаанд.
Роҳбари Ӯзбекистон саҳми Аркадаг ва сарони тамоми давлатҳои минтақа дар пешбурди ҳамкориҳо дар Осиёи Марказиро махсус таъкид намуд. Зикр шуд, ки имрӯз тамоми ҷомеаи ҷаҳонӣ муваффақияти муштаракро дар бунёди модели нави ҳамкории минтақавӣ ва ҳувияти муштарак эътироф мекунад.
Дар анҷом Сарвари кишвари мо, бори дигар барои ҷоизаи олии давлатӣ изҳори сипос намуда, мардуми бародари туркманро ба муносибати Конфронси Созмони Милали Муттаҳид, ки дар ин рӯзҳо баргузор мегардад, табрик гуфта, барои баргузории муваффақонаи ҳамоиши ҷаҳонӣ дар моҳи декабри соли ҷорӣ дар шаҳри Ашқобод дар доираи Соли байналмилалии сулҳ ва эътимод орзуи нек баён кард.
