Дар чорабинӣ беш аз 300 нафар роҳбарон ва намояндагони корхонаҳои пешқадами саноатӣ ва ширкатҳои савдо, ташкилотҳои соҳавӣ ва сохторҳои соҳибкории ду кишвар ширкат варзиданд.
Аз ҷониби Покистон ширкатҳои “PEL”, “Waves Singer”, “Sadaqat”, “Fauji”, “Platinum”, “Fast Cables”, “National Fruit”, “Amson Group”, “Shaigan”, “Hans International”, “Secure Logistics Group”, “NLC”, “Fairmont”, “Go Dairy”, “Engro”, “Herbion”, “AGP”, “Arco”, “Habib Rafiq”, “Pakistan Steel Mills”, “Siddiq Sons”, “Uniworth”, “Diners”, “Fatima Group”, “Fateh Group”, “Hub Leather”, “Siddiq Leather”, “Royal Leather”, “Davis”, “Ahsan Dyeing” ва ширкатҳои дигар иштирок намуданд.
Сарвари давлат дар суханронии худ бо қаноатмандӣ таъкид кард, ки музокирот дар сатҳи олӣ дар рушди муносибатҳои Ӯзбекистон ва Покистон, пеш аз ҳама дар самтҳои савдо-иқтисодӣ ва сармоягузорӣ марҳалаи навро оғоз бахшид.
Бори нахуст дар таърихи равобити мутақобил созишномае ба имзо расид, ки ба ҳамкориҳои иқтисодӣ мазмуни нав мебахшад ва ба 2 миллиард доллар расонидани ҳаҷми савдоро ҳадаф қарор медиҳад.
Ба мутасаддиёни ҳар ду кишвар супориш шуд, ки «харитаи роҳ»-и мукаммал таҳия намуда, механизми ҳалли фаврии масъалаҳоро, ки ба миён меоянд, ҷорӣ намоянд.
Президенти Ӯзбекистон самтҳои муҳими шарикии иқтисодиро муайян кард. Густариши ҳамкорӣ дар соҳаҳои фармасевтика ва тиб, саноати сабук, сохтори кӯҳиву металлургия, геология, инчунин амнияти озуқаворӣ аз ин ҷумлаанд.
Ширкатҳои покистонӣ барои иштирок дар лоиҳаҳои маҳаллисозии истеҳсоли доруҳо, биотехнологияҳо ва таҷҳизоти тиббӣ дар Ӯзбекистон даъват гардиданд. Дар парки фармасевтикаи Тошканд барои сармоягузорони Покистон шароити мусоид фароҳам оварда мешавад.
Зикр гардид, ки барои истеҳсоли муштараки маҳсулоти тайёри нассоҷӣ барои брендҳои байналмилалӣ иқтидори бузург мавҷуд аст. Ӯзбекистон барои ба идоракунии боэътимод супоридани корхонаҳои нассоҷии худ ва таъсиси минтақаҳои махсуси саноати чарм баҳри ҳамкорони покистонӣ омода аст.
Ба масъалаи дар ҳамкорӣ парвариш намудани гӯшт, картошка ва биринҷ, инчунин дурнамои ҳамкорӣ бо Институти миллии геномикаи Покистон дар соҳаҳои тухмипарварӣ ва селексия диққати махсус дода шуд.
Тақвияти ҳамгироии мутақобил дар соҳаи нақлиёт-логистика шарти муҳими афзоиши минбаъдаи ҳаҷми савдо маҳсуб меёбад.
Интиқоли борҳо дар масири «Покистон – Чин – Қирғизистон – Ӯзбекистон», парвозҳои ҳавоӣ ба шаҳрҳои Лоҳур ва Исломобод ба роҳ монда шуд, лоиҳаи сохтмони роҳи оҳани Трансафғон пешбарӣ мешавад. Аз моҳи апрели соли ҷорӣ парвозҳои боркаш ба Карочӣ ва парвозҳои мустақими мусофирбар ба Лоҳур роҳандозӣ хоҳанд шуд.
Бо мақсади таҳкими робитаҳои амалӣ байни минтақаҳо ташаббуси баргузории аввалин Форуми байниминтақавӣ дар соли ҷорӣ дастгирӣ ёфт.
Дар анҷоми чорабинӣ роҳбари Ӯзбекистон ва Сарвазири Покистон дар бораи тавофуқҳое, ки ба даст омаданд, Созишнома имзо карданд. Дар он муҳлатҳои иҷро ва роҳбарони барои ин масъули вазорату идораҳои ҳар ду кишвар муайян гардиданд.
Ҳамчунин, дар ҳузури роҳбарон маросими табодули як қатор созишномаҳои сармоягузорӣ ва савдо-иқтисодӣ баргузор гардид.
