Тавре ки сармуҳаррири Il Foglio Клаудио Чераса қайд кард, нашрия тасмим гирифт, ки ин таҷрибаро гузаронад, то нишон диҳад, ки чӣ гуна технологияҳои зеҳни сунъӣ журналистикаи муосирро тағйир медиҳанд. Шумораи махсуси Il Foglio AI 18 марти соли 2025 нашр шуд. Он аз чор саҳифа иборат буда, ҳам дар шакли чопӣ ва ҳам онлайн дастрас аст.
"Ин аввалин рӯзномаи ҳаррӯза дар ҷаҳон аст, ки пурра аз ҷониби зеҳни сунъӣ таҳия шудааст: аз мақолаҳо ва сарлавҳаҳо то иқтибосҳо ва шарҳҳо", — гуфт Чераса.
Ба гуфтаи муҳаррир, рӯзноманигорон танҳо саволҳо медоданд ва посухҳоро таҳрир мекарданд. Ӯ қайд кард, ки нейросеть мақолаҳои содда ва фаҳмо менавишт, ки хатоҳои грамматикӣ надоштанд. Аммо ҳеҷ як мақола иқтибосҳои мустақими одамонро дар бар намегирифт. Бар хилофи журналистикаи анъанавӣ, дар ин шумора на ақидаҳои шахсӣ, на таҳлили амиқ ва на мусоҳибаҳои зинда мавҷуд буданд.
Чераса боварӣ дорад, ки ин озмоиш ба фаҳмидани он, ки ЗС чӣ гуна метавонад ба раванди эҷоди хабарҳо мувофиқат кунад, кӯмак хоҳад кард, менависад РБК.
Нашрияҳои дигари бузург низ эътироф мекунанд, ки барои автоматикунонии вазифаҳо ва омодасозии мақолаҳо аз нейросетҳо истифода мебаранд. Масалан, Associated Press дастурамале барои рӯзноманигорон таҳия кардааст, ки чӣ гуна аз имкониятҳои ЗС истифода баранд. Дар агентӣ бар он назаранд, ки нейросетҳо метавонанд ба муҳаррирон дар таҳияи сарлавҳаҳо, эҷоди ғояҳо барои мақолаҳо, таҳияи саволҳо барои мусоҳибаҳо ва таҳрири матн кӯмак расонанд. Бо вуҷуди ин, нашри пурра маводи тавлидкардаи ЗС манъ аст ва рӯзноманигорон барои ҳар як калима дар матн масъуланд.
Дар моҳи августи соли 2024 ширкати технологии OpenAI бо ноширии Conde Nast, ки маҷаллаҳои машҳури Vogue, The New Yorker ва GQ-ро нашр мекунад, созишномаи ҳамкории бисёрсоларо ба имзо расонд. Роҳбарияти Conde Nast ҳамкорӣ бо OpenAI-ро ҳамчун як имконият барои ҷуброни талафоти вобаста ба тағйироти моделҳои тиҷоратии расонаҳо арзёбӣ мекунад.
Бо вуҷуди ин, на ҳамаи нашрияҳо истифодаи зеҳни сунъиро дастгирӣ мекунанд. Пештар дар ИМА як рӯзноманигор барои истифодаи нейросет аз кор ронда шуд. Ин хабарнигор барои навиштани гузоришҳо ва ҳатто тавлиди иқтибосҳои раҳбари иёлати Вайоминг аз зеҳни сунъӣ истифода кардааст.
