Professor Bali Pulendran rahbarligidagi ilmiy guruh tomonidan amalga oshirilgan ushbu yangilik tibbiyot olamida soʻnggi 200-yil davomida vaksinalar yaratilish tamoyilini butunlay oʻzgartirib yuborishi mumkin boʻlgan keskin burilish sifatida baholanmoqda.
Odatda vaksinalar maʼlum bir kasallikka, masalan, qizamiq yoki suvchechakka qarshi kurashish uchun organizmni maxsus oʻrgatadi. Ammo “Science” jurnalida tasvirlangan Stenford olimlarining yangi yondashuvi immunitet tizimini shunchaki “mashq qildirmaydi”, balki immun hujayralarining oʻzaro aloqa qilish usulini taqlid qiladi. Burun spreyi koʻrinishidagi dori oʻpkadagi makrofag deb ataluvchi oq qon hujayralarini doimiy shay holatga keltirib qoʻyadi. Natijada, organizmga qanday infeksiya kirishga urinmasin, immunitet tizimi uni darhol qaytarishga tayyor turadi.
Hayvonlarda oʻtkazilgan tajribalar davomida ushbu himoya effekti qariyb uch oy davom etgan. Olimlarning taʼkidlashicha, bunday yuqori shaylik holati viruslarning oʻpka orqali organizmga kirishini 100 dan 1000 baravargacha kamaytirgan. Professor Pulendranning soʻzlariga koʻra, ushbu universal vaksina nafaqat gripp yoki COVID-19, balki deyarli barcha maʼlum viruslar, bakteriyalar va hatto allergenlarga qarshi keng qamrovli himoyani taʼminlaydi.
Tadqiqot shuni koʻrsatdiki, yangi usul uy changi oqibatida kelib chiqadigan allergik astma qoʻzgʻalishini ham kamaytiradi. Oksford universiteti ekspertlari bu yangilikni “haqiqatan ham hayajonlanarli” deb atashmoqda. Agar insonlarda oʻtkaziladigan klinik sinovlar ham muvaffaqiyatli yakunlansa, bu ixtiro nafas yoʻllari kasalliklariga qarshi kurashda inqilobiy qadam boʻladi va mavsumiy kasalliklar yukini sezilarli darajada yengillashtiradi.
