Maktab direktori lavozimi uchun nomzodlardan menejerlik sertifikati talab qilinadi

    Ta'lim 13 May 2022 4551

    2022-yil 1-dekabrga qadar maktab direktori lavozimiga nomzodlarning bilim va koʻnikmalarini baholash hamda baholash natijasi boʻyicha ularga menejerlik sertifikatini berish amaliyoti yoʻlga qoʻyiladi.

    Bu haqda Oʻzbekiston Respublikasi Prezidentining “2022–2026-yillarda xalq taʼlimini rivojlantirish boʻyicha milliy dasturni tasdiqlash toʻgʻrisida”gi farmonida belgilandi.

    Shuningdek, qarorga muvofiq, 2023-yil 1-yanvardan boshlab:

    maktab direktori lavozimiga nomzodlar menejerlik sertifikatini olish uchun Milliy-tadqiqot institutida maxsus pullik dasturlar asosida jamoada ishlash va ota-onalar bilan muloqot qilish, boshqaruv, moliya hamda axborot-kommunikatsion texnologiyalar boʻyicha oʻqitiladi;

    oʻqitish yakuni boʻyicha Milliy-tadqiqot instituti tomonidan maktab direktori lavozimiga nomzodlarning menejment sohasi boʻyicha bilimi va koʻnikmalari baholanadi hamda natijasi boʻyicha menejerlik sertifikati beriladi;

    maktab direktori lavozimiga nomzodlar faqat menejerlik sertifikatiga ega boʻlgan shaxslar orasidan tanlab olinadi.