Mutaxassis allergiyaga moyil kishilar uchun sovuqdan himoyalanish boʻyicha tavsiya berdi.
Ilmira Razikova, Respublika ixtisoslashtirilgan allergologiya va klinik immunologiya ilmiy-amaliy tibbiyot markazi direktori:
— Qishning izgʻirin kunlarida terida qizarish, shish, pufakchalar va qichishish kabi sovuqqa allergiya belgilari kuzatilsa, allergolog-immunologga murojaat qilish va shifokor koʻrsatmasiga koʻra, maxsus sinamalarni topshirish zarur. Shundan soʻng mutaxassis tegishli davo muolajalarini belgilaydi.
Allergiyaga moyilligi bor kishilar sovuqdan himoyalanishda quyidagi tavsiyalarga amal qilishlari kerak:
- Avvalo, qalin kiyinish zarur! Qoʻlqop, bosh kiyim, sharf va issiq paypoqlardan foydalaning!
- Izgʻirin haroratda koʻchaga chiqishdan avval shifokor tavsiya etgan himoya kremlari va maxsus malhamlarni qoʻllang!
- Sovuq ichimlik va yeguliklar isteʼmol qilmang!
- Yuvinish va choʻmilish chogʻida qattiq mochalkalardan foydalanmang!
- Immunitetni mustahkamlovchi mahsulotlar, darmondorilar, temir, kalsiy, sink, kaliy, selenga boy taomlar isteʼmol qiling!
