Muhokama kun tartibiga oliy darajadagi tashriflar yakunida erishilgan ikki tomonlama kelishuvlar asosida investitsiyaviy, savdo-iqtisodiy va moliya-iqtisodiy hamkorlikning joriy masalalari va istiqbollari, shuningdek, 2020-yilda oʻtkazilgan qoʻshma tadbirlar natijalari kiritildi. Janubiy Koreya tomonining fikriga koʻra, ushbu muzokaralar hukumat darajasida mazkur yil boshidan buyon oʻtkazilgan birinchi shunday tadbirdir.
Janubiy Koreya tomoni investitsiya sohasida mavjud boʻlgan barcha kelishuvlarni sifatli va oʻz vaqtida amalga oshirishga sodiqligini bildirdi. Ayni paytda energetika, neft-gaz sektori, kimyo, elektrotexnika va farmatsevtika sanoati, mashinasozlik, sogʻliqni saqlash, taʼlim va turizm sohalarida yangi investitsiya loyihalari toʻplami shakllangani taʼkidlandi. Ushbu loyihalar boʻyicha aniq tashabbuskorlar, moliyalashtirish manbalari va ruyobga chiqarish muddatlari aniqlab boʻlingan.
Bundan tashqari, Toshkent viloyatining Zangiota tumanida “Tashkent Pharma Park” farmatsevtika klasterini barpo etish, koʻp tarmoqli zamonaviy tibbiyot markazi, ilmiy-tadqiqot va loyihalash instituti - Kimyo texnologiyalari markazini yaratish, Buxoro neftni qayta ishlash zavodi va Muborak IEMni modernizatsiya qilish va qayta tiklashdan iborat qoʻshma va boshqa bir qator loyihalarni amalga oshirish boʻyicha oʻzaro hamkorlik mexanizmlari koʻrib chiqildi.
Alohida tartibda Iqtisodiy hamkorlik va taraqqiyot jamgʻarmasi (EDCF) Oʻzbekiston bilan umumiy qiymati 1 mlrd dollarga teng boʻlgan 2021-2023-yillarga moʻljallangan yangi hamkorlik dasturiga muvofiq hamkorlik qilish masalalari ham koʻrib chiqildi. Dastur doirasida ustuvor loyihalar belgilab olingan. Janubiy Koreya tomoni yaqin kelajakda loyihalarning amaliy tatbiqiga oʻtish maqsadida ularni kelishish jarayonlarini tezlashtirishga tayyorligini maʼlum qildi.
Tomonlar savdo toʻsiqlarini olib tashlash hamda Oʻzbekiston va Koreya Respublikasi tovarlarining ikki mamlakat bozorlariga chiqishiga koʻmaklashishga qaratilgan samarali chora-tadbirlar koʻrish orqali oʻzaro savdo aylanmasini oshirish istiqbollarini muhokama qildilar. Har ikki taraf oʻzaro savdoni diversifikatsiya qilish va uning hajmlarini sifat jihatidan yangi bosqichga koʻtarish boʻyicha qoʻshma amaliy chora-tadbirlarni ishlab chiqish maqsadida hamkorlikni yana-da kengaytirishga tayyor ekanliklarini bayon qildilar.
Tomonlar keng koʻlamli sohalarda hamkorlikning asosiy shartlari va tamoyillariga eʼtibor qaratdilar. Jumladan, Oʻzbekiston va Koreyada ishlab chiqilgan mahsulotlarning ikki mamlakat bozorlariga kirishini taʼminlash, oʻzaro savdodagi nomutanosiblikni bartaraf etish mexanizmlari, Koreya tomonining Oʻzbekistonni jadal sanoatlashtirish, infratuzilmani rivojlantirish va turli sohalarda ilgʻor Koreya texnologiyalarini joriy etishda amaliy yordamining aniq choralarini oʻz ichiga oladigan barqaror savdo-iqtisodiy sheriklik toʻgʻrisida bitimni tuzish masalasida muzokara jarayonini boshlashga tayyor ekanliklarini bildirdilar.
Shuningdek, kun tartibida moliya-texnik sohasidagi hamkorlik masalalari koʻrib chiqildi — Koreya xalqaro hamkorlik agentligi (KOICA)ning grant mablagʻlarini jalb etgan holda yangi loyihalarni amalga oshirish boʻyicha takliflar oʻrganib chiqildi va ularni kelishish, tasdiqlash va hayotga tatbiq etish boʻyicha navbatdagi tadbirlar rejalashtirildi.
Janubiy Koreya tomoni koronavirus infeksiyasi tarqalishiga qarshi kurash va pandemiyaning iqtisodiy oqibatlarini kamaytirish boʻyicha chora – tadbirlarni amalga oshirish doirasida Oʻzbekistonga moliyaviy-texnik koʻmak koʻrsatishda davom etishi maʼlum qilindi. Jumladan, 25-yanvar kuni Koreya Hukumati Oʻzbekistonda “COVID-19 infeksiyasiga qarshi shoshilinch choralar koʻrish” dasturini amalga oshirish uchun qoʻshimcha grant ajratishga qaror qildi.
Raqamli iqtisodiyotni rivojlantirish va Oʻzbekistonda sanoatni raqamlashtirish borasida Janubiy Koreya tajribasini joriy etish muzokaralarning muhim qismi boʻldi. Yaqin kelajakda innovatsion tarmoqlar, fermer xoʻjaliklari, “aqlli” shaharlar, raqamli sogʻliqni saqlash xizmatlarini joriy etish va inson resurslarini rivojlantirishni qamrab olgan raqamlashtirish sohasida hamkorlik Memorandumi imzolanishi kutilmoqda.
Shuningdek, tomonlar Oʻzbekistonning Jahon savdo tashkilotiga aʼzo boʻlishi doirasida ikki tomonlama hamkorlikni faollashtirishga, jumladan, Koreya xalqaro iqtisodiy siyosat instituti ekspertlarini jalb etish amaliyotini kengaytirishga kelishib olindi. Ekspertlar Oʻzbekiston davlat xizmatchilari uchun treninglar oʻtkazishni boshab yuborgan.
Videokonferensiya yakunida belgilangan loyiha va tashabbuslar doirasida tizimli hamkorlikni yoʻlga qoʻyish boʻyicha kelishuvga erishildi. Barcha sohalardagi ishlar tegishli vazirlik va idoralar rahbarlari hamda ikki mamlakat ekspertlari darajasida videokonferensiyalar shaklida faol davom ettiriladi.
