Tadbir doirasida tor soha mutaxassislari tomonidan aholiga tibbiy xizmat ko‘rsatildi.
Bunda zamonaviy MRT, sayyor mammografiya, EKG, UTT uskunalari uchun xoslangan maxsus mobil tibbiyot xonalari imkoniyatlaridan unumli foydalanildi.
— Ushbu ambulator-diagnostika markazi aholiga malakali tibbiy xizmat ko‘rsatishga mo‘ljallangan bo‘lib, Osiyo taraqqiyot banki ko‘magida qurilgan, — deydi tuman tibbiyot birlashmasi boshlig‘i Tabassum Ro‘zmetova. — Aksiya davomidagi tekshiruvlarda kasalliklar aniqlangan ehtiyojmand fuqarolar stasionar sharoitda davolanadi.
Ta’kidlash lozimki, joriy yil Qoraqalpog‘iston Respublikasida shunday tibbiy ko‘riklar orqali 18-40 yoshdagi 753 ming nafar aholini profilaktik ko‘rikdan, 40 va undan katta yoshdagi surunkali kasalligi bo‘lmagan 548 ming nafar fuqaroni yurak-qon tomir xastaligi va qandli diabet bo‘yicha skrining tekshiruvlaridan o‘tkazish rejalashtirilgan.