Oʻzbekiston-Xitoy qoʻshma loyihasi doirasida ishga tushirilishi rejalashtirilgan genetika markazi yiliga 5 ming nafar chaqaloqlarda 48 turdagi skrining tekshiruvlarni oʻtkazish, chaqaloqlarda tugʻma va irsiy kasalliklarni erta bosqichlarda aniqlash va davolash imkonini beradi.
—Xitoyda, qolaversa dunyodagi koʻpgina mamlakatlarida bolalarda uchrayotgan genetik kasalliklarni aniqlash va tashxislashda oʻz nufuziga ega boʻlgan “BGl Genomies” kompaniyasi bilan innovatsion loyihalar asosida hamkorlik aloqalarini oʻrnatganmiz, —deydi Oliy taʼlim, fan va innovatsiya vaziri oʻrinbosari Shahlo Turdiqulova. — Sirdaryoga taqdim etayotgan yangi loyihamiz nogironlikka sabab boʻluvchi genetik kasalliklarni aniqlashga va tashxislashga moʻljallangan boʻlib, genetik kasalliklar sabab nogiron boʻlib qoladigan bolalar sonini sezilarli darajada qisqartirish imkonini beradi.
Shu maqsadda, viloyatga tashrif buyurgan “BGl Genomies” Xitoy kompaniyasining MDH davlatlar boʻyicha vakili Jun Cheng xonim Oliy taʼlim Sirdaryo viloyat sogʻliqni saqlash boshqarmasi tizimidagi “Ona va bola” skrining markaziga tashrif buyurdi.
Ular u yerda, markaz faoliyatini koʻzdan kechirib, bolalarda uchrayotgan genetik kasalliklarni erta bosqichlarda aniqlash va tashxislash yuzasidan Sirdaryoda olib borilayotgan ishlar bilan tanishib, kelgusida genetika sohasini Sirdaryoda rivojlantirish, 48 turdagi genetik kasalliklarni aniqlash va tashxislashga ixtisoslashgan markaz faoliyatini Davlat xususiy sherikchilik asosida yoʻlga quyish masalasi yuzasidan Sirdaryo viloyat sogʻliqni saqlash boshqarmasi tizimi vakillari bilan fikr almashdi.
Gʻulom Primov,
Sirdaryo viloyat sogʻliqni saqlash boshqarmasi matbuot kotibi.
