Suv – gavhar, ilm – zafar,
Havas qilgay yosh-qari.
Suvni aziz bilgan, ey
Elning mard oʻgʻlonlari.
Suvsiz yer – jonsiz vujud
Mardsiz el – manzilsiz yoʻl.
Manzilga yetmoqqa ham
Sizday yigitlar masʼul.
Muammoga yechim tutgan
Asilbek, Pahlavonlar.
Ilm yoʻlida mayoq boʻlgan
Ham ustoz Sohibxonlar
Ikki oʻzbek oʻgʻlon bermish
Kelajakning taʼbirin.
Baraka suv – yomgʻir suvin
Qayta ishlash tadbirin.
Prezident maktabining
Nomin ulugʻlab kelgan.
Shayx Nohayon huzurida
Yurt shaʼnin baland qilgan.
Suvchi – zargar, degan el
Eʼzozlar, tutgay ulugʻ.
Zargarning qadrin bilgan
Shu elga ming bor qulluq.
Ilmni baland tutgan,
Nomingizga sharaf-shaʼn.
Yuksalar, obod boʻlar
Sizlar bilan bu Vatan.
***
Birlashgan Arab Amirliklari poytaxti Abu-Dabi shahrida “Zayed Sustainability Prize” tanlovida Toshkent shahridagi Prezident maktabi oʻquvchilari oʻz ixtirolari bilan gʻolib deb topildi. Ularga mukofotni BAA Prezidenti Shayx Muhammad bin Zoid Ol Nahayon topshirdi.
Taqdirlash marosimida Prezidentimiz Shavkat Mirziyoyev ishtirok etib, gʻoliblarni gʻalaba bilan qizgʻin tabrikladi.
Tanlovda Prezident maktabi oʻquvchilari Pahlavon Gʻulomov va Asilbek Ashrapov hamda ularning ustozi Sohibxon Azizovning yomgʻir suvini ichishga yaroqli darajagacha qayta ishlash loyihasi “Global oʻrta maktablar“ nominatsiyasi boʻyicha gʻalabani qoʻlga kiritgan.
Kuni kecha Toshkentda ikki nafar oʻquvchining ota-onasi va ustoziga Prezident nomidan mukofotlar topshirildi. Shuningdek, ularga BYD avtomobillari ham sovgʻa qilindi.
Gʻoliblarni chin dildan tabriklab, ularning kelgusi oʻqish va ishlarida ulkan muvaffaqiyatlar tilaymiz!
Suv xoʻjaligi vazirligi Axborot xizmati.
