Hujjat Suv xoʻjaligi vazirligi va uning tizimidagi tashkilotlar faoliyatini tartibga solish, ularning asosiy vazifalari va funksiyalarini Prezidentning 07.05.2024-yildagi «Suv xoʻjaligida zamonaviy boshqaruv tizimini joriy qilish va rivojlantirishning ustuvor yoʻnalishlarini belgilash toʻgʻrisida«gi PF-74-sonli Farmoniga muvofiq belgilash maqsadida qabul qilingan.

Suv xoʻjaligini boshqarishni isloh qilishning asosiy yoʻnalishlari quyidagilardan iborat:

• Suv xoʻjaligi vazirligi tuzilmasini yuqori, oʻrta va quyi boʻgʻinlarga ajratish yoʻli bilan tashkil etish, funksiyalarini aniq koʻrsatgan holda;
• Vazirlikning Yagona suv balansi va kadastrini yuritish boʻyicha vakolatlarini belgilash;
• Suvdan foydalanish va uni muhofaza qilish ustidan davlat nazoratining samaradorligini oshirish;
• Sohaning strategik va innovatsion gʻoyalar, ilmiy asoslangan takliflar va tashabbuslar asosida rivojlanishini taʼminlash;
• Suv xoʻjaligi obyektlarining xususiy sektor uchun jozibadorligini oshirish;
• Suvdan foydalanish uchun ruxsat berish tizimini soddalashtirish;
• Mehnatga haq toʻlash tizimini takomillashtirish hisobiga sohaga malakali mutaxassislarni jalb qilish va kadrlar qoʻnimsizligini kamaytirish;
• Yirik suv xoʻjaligi obyektlarini qurish boʻyicha loyiha hujjatlarini ishlab chiqish tizimini tubdan isloh qilish va tarmoq loyiha institutlarini faollashtirish.

Hujjat bilan quyidagilar tasdiqlandi:

• Suv xoʻjaligi vazirligi toʻgʻrisidagi nizom;
• Suv xoʻjaligi obyektlarini ekspluatatsiya qilish agentligi toʻgʻrisidagi nizom;
• Suv xoʻjaligi loyihalarini amalga oshirish departamenti toʻgʻrisidagi nizom;
• Suv xoʻjaligida xorijiy investitsiya loyihalarini amalga oshirish markazi toʻgʻrisidagi nizom;
• Suv xoʻjaligini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom;
• Suv xoʻjaligi vazirligi va uning tizimidagi tashkilotlar xodimlariga ish haqi va moddiy ragʻbatlantirish toʻlovlari toʻlash tartibi toʻgʻrisidagi nizom;
• Suv xoʻjaligi vazirligi va uning tizimidagi byudjet tashkilotlari roʻyxati, shuningdek Suv xoʻjaligi loyihalarini amalga oshirish departamenti tizimidagi «Suvqurilishinvest« davlat muassasalari roʻyxati;
• «Oʻzbekiston Respublikasi suv xoʻjaligi aʼlochisi« koʻkrak nishoni toʻgʻrisidagi nizom, nishonning tavsifi va uning guvohnomasi;
• Suv xoʻjaligi vazirligi va uning tizimiga kiruvchi byudjet tashkilotlariga xizmat avtomobillarini biriktirish qoidalari;
• «Termiz suv yoʻllari texnik uchastkasi«, «Xoʻjayli suv yoʻllari texnik uchastkasi« va «Cholish suv yoʻllari texnika boʻlimi« davlat muassasalarining moddiy-texnik bazasini yanada mustahkamlash boʻyicha 2024-2027-yillarga moʻljallangan chora-tadbirlar dasturi.

Hujjat Qonunchilik maʼlumotlari milliy bazasida davlat tilida eʼlon qilingan va 2024-yil 8-oktyabrdan kuchga kirgan.