Zoom aloqa vositasi orqali boʻlib oʻtgan uchrashuvda ikki mamlakat oʻrtasidagi hamkorlik aloqalarining bugungi holati va istiqbolli rejalari haqida soʻz bordi.

Aytish joizki, bugungi kunga qadar Oʻzbekiston Respublikasi va Xitoy Xalq Respublikasi oʻrtasida xalq taʼlimi sohasidagi hamkorlik doirasida respublika umumtaʼlim maktablarining moddiy -texnik bazasini yaxshilash va modernizatsiyalashga qaratilgan investitsiya loyihalari va tadbirlari amalga oshirildi. Xususan Xitoyning grant mablagʻlari hisobiga Oʻzbekistondagi maktablar zamonaviy oʻquv-kompyuter sinflari bilan jihozlanib, ushbu loyihaning 2 fazasi doirasida qoʻshimcha 1 300 ta kompyuter-sinflari yurtimizga keltirilishi koʻzda tutilmoqda.

Tomonlar bugun Xitoy bilan savdo-iqtisodiy aloqalar rivojlangan bir paytda Oʻzbekistonda xitoy tilini oʻrganish, xitoy universitetlariga oʻqishga maktab bitiruvchilarimizga imkoniyatlarni kengaytirish yoʻnalishi mos ravishda oʻsmayotgani va bu yoʻnalishda hamkorlikni yanada kengaytirish lozimligini qayd etdi.

Elchi va vazir oʻrtasidagi muzokaralar chogʻida Oʻzbekistonda xitoy tilini ommalashtirish boʻyicha hamkorlikni kengaytirish, Xitoy taʼlim vazirligi bilan aloqalar oʻrnatish orqali ikki davlat oʻrtasida tajriba almashishni yoʻlga qoʻyish, Xitoy OTM oʻzbekistonlik oʻquvchilar uchun kvotalarni oshirish masalalari muhokama qilindi, deb xabar beradi Xalq taʼlimi vazirligi matbuot xizmati.