Aytilishicha, Farmatsevtika tarmogʻini rivojlantirish agentligiga Dori vositalari, tibbiy buyumlar va tibbiy texnika ekspertizasi va standartlashtirish davlat markazi tomonidan oʻtkazilgan ekspertiza natijalari yuzasidan xat kelib tushgan.

— Ekspertiza natijalariga koʻra, Toshkent shahridagi ayrim dorixonalardan xarid qilingan (seriya 550323, yaroqlilik muddati 11.2025, JAJ ʻGalichfarmʻ) “L-Lizin Essinat Ineksiya uchun eritma 5 ml” dori vositasi Davlat markazi tomonidan oʻtkazilgan ekspertiza natijalariga koʻra qalbakilashtirilgan dori vositasi ekanligi aniqlangan, — deydi Sevara Tulyaganova. — Ushbu dori vositasini muomalasiga chek qoʻyish maqsadida, muvofiqlik sertifikatiga ega boʻlmagan, davlat roʻyxatidan oʻtmagan, qalbakilashtirilgan dori vositasi zudlik bilan muomaladan chiqarilishi hamda dori vositalarining inson sogʻligʻiga zararli taʼsirini tasdiqlovchi faktlar aniqlangan taqdirda muomaladan chiqarish va yoʻq qilish tartibi toʻgʻrisidagi nizomda belgilangan tartibda yoʻq qilinish boʻyicha tegishli koʻrsatma berildi.

Agentlik masʼullari tadbirkorlarga murojaat qilib, amaldagi qonunchilikka koʻra, ushbu huquqbuzarliklar maʼmuriy va jinoiy javobgarliklar bilan bir qatorda litsenziya talab va shartlarining qoʻpol buzilish holati deb baholanishini, bu litsenziyaning bekor qilinishiga asos boʻlishini eslatgan.

«Sizlardan ushbu huquqbuzarlik holatiga yoʻl qoʻymaslik va uni bartaraf etish choralarini koʻrishingizni soʻraymiz», — deyiladi agentlik masʼuli tadbirkorlarga murojaatida.