Muqimiy nomidagi Oʻzbekiston davlat musiqali teatrida yozuvchi Qoʻchqor Norqobil asari asosida sahnalashtirilgan "Zamon Avloniysi" musiqali spektaklining jamoatchilik koʻrigi oʻtkazildi.
Jamoat koʻrigida ishtirok etgan Oʻzbekiston Respublikasi Madaniyat vazirligi hamda Teatr Arboblari uyushmasi mutaxassislari mazkur sahna asarida millat kelajagi bilan bogʻliq dolzarb mavzuga qoʻl urilganini taʼkidlashdi.
Mutaxassislar tomonidan spektaklning yutuq hamda baʼzi juzʼiy kamchiliklari eʼtirof etildi, ayrim tuzatishlarni inobatga olgan holda premyeraga ruxsat berildi.
Spetakl premyerasi 1-noyabrdan boshlab, uch kun davomida namoyish etiladi.
17-may kuni Toshkent shahridagi Oʻzbekiston kasaba uyushmalari saroyida maʼrifatparvar jadid bobolarimizning ibratli hayot yoʻllari, ilmiy-maʼnaviy merosini targʻib qilishga qaratilgan jadidlar orzusi nomli spektakl namoyish etildi. Spektaklda Mahmudxoʻja Behbudiy, Abdulla Avloniy, Munavvarqori Abdurashidxonov, Choʻlpon kabi millat oydinlarining qalb kechinmalari, ertani porloq koʻrish orzusi aks etgan.
Spektakl namoyishidan koʻzlangan maqsad ham har bir vatandoshimiz qalbida jadid bobolarimizdagi shiddatni uygʻotish, ularni millat birligi va taraqqiyoti yoʻlida yagona maqsad sari ogʻishmasdan yakdillikda harakat qilishga undashdir.
