Әмелий ушырасыў ҳәм баспасөз брифинги Ташкент қаласында Президент Шавкат Мирзиёевтиң басламасы менен шөлкемлестирилген Орайда болып өтти. Онда еки мәмлекеттиң мәдений ҳәм илимий мийрасын таныстырыў бойынша бирге ислесиў тийкарғы тема болды.
"Өзбекстан Президенти Шавкат Мирзиёевтиң басламасы ҳәм тапсырмалары менен бүгинги күнде бийбаҳа мийрасымызды қәстерлеп сақлаў, оны дүньяға танытыў бойынша кең көлемли жумыслар әмелге асырылмақта. Биз халықаралық жәмийетшиликке мәдениятымыздың байлығын, уллы ата-бабаларымыздың дүнья цивилизациясына қосқан үлесин көрсетип атырмыз. Жақында ЮНЕСКО майданында болып өткен илажлар буның айқын дәлийли болды.
Бүгин биз және бир әҳмийетли қәдем тасладық - Россиядағы тийкарғы шеригимиз - "Россия" миллий орайы менен биргеликтеги жумысларымыздың жаңа бағдарларын белгилеп алдық. Бизиң ўазыйпамыз - бул шерикликти тарийхый тамырлары терең болған халықларымыз бир-бириниң мәдениятын және де терең үйренип, келешек әўладлар ушын байланысларды беккемлеўге хызмет ететуғын анық жойбарлар менен байытыўдан ибарат. Россияда Өзбекстан күнлерин өткериўге мирәт еткени ушын "Россия" миллий орайынан миннетдармыз.
Өз гезегинде, Өзбекстандағы Ислам цивилизациясы орайы платформасында кесилиспе күнлерин шөлкемлестириўге мирәт етемиз. Сондай-ақ, россиялы кәсиплеслеримиз Ислам цивилизациясының бийбаҳа мийрасы менен жақыннан танысыўы ушын усы күнлер шеңберинде Өзбекстанның әййемги қалаларына мирәт етиўден қуўанышлы боламыз", - деп атап өтти Өзбекстандағы Ислам цивилизациясы орайының директоры Фирдавс Абдухолиқов.
Россия тәрепи Өзбекстан күнлерин 2027-жыл март айында Москвада өткериўди усыныс етти ҳәм буның ушын "Россия" миллий орайының майданын берди.
"Россия ҳәм Өзбекстанның дослығы жүз жыллық биргеликтеги тарийх, мәденият ҳәм жетискенликлерге ийе. Президентимиз Владимир Владимирович Путин бәрқулла айтатуғынындай, ҳәр бир жетискенликтиң артында ең тийкарғысы - инсанлар турады. Мәмлекетлеримиз арасындағы қатнасықлар болса, биринши гезекте, улыўма дәстүрий қәдириятларды бирлестиретуғын инсанлар арасындағы қатнасықлар болып есапланады. Онда кесилиспе күнлер шеңберинде биз ушын ең әҳмийетлиси - өтмишти еслеў ҳәм қәстерлеп сақлаў, мәмлекетлеримиз, халықларымыздың келешеги ҳәм реал жойбарлар ҳаққында сөйлесиў болып табылады.
Барлық бирге ислесиўимиз, биринши гезекте, анық нәтийже бериўи керек. Усы мүнәсибет пенен 2027-жыл март айында Москва қаласындағы "Россия" миллий орайында Өзбекстан күнлерин өткериўди усыныс етемиз. Биз еки мәденият - Россия ҳәм Өзбекстанның жыллы ҳәм нәтийжели сөйлесиўи ушын барлық мәкан ҳәм имканиятларды жаратып бериўге таярмыз", - деди "Россия" миллий орайының бас директоры Наталья Виртуозова.
Ушырасыў жуўмағында 2027-2030-жылларға мөлшерленген бирге ислесиў ҳаққындағы меморандумға қол қойылды. Кесилиспе күнлерин "Улыўма тарийхтан - улыўма келешекке қарай" сүрени астында өткериў усыныс етилди.
Сондай-ақ, тәреплер 2027-2030-жылларға мөлшерленген үш жыллық Россия-Өзбекстан бирге ислесиў жол картасын ислеп шығыўға еки мәмлекеттиң жетекши экспертлери, илимпазлары ҳәм қәнигелерин тартыў бойынша келисимге еристи. Усы жылдың ноябрь-декабрь айларында Өзбекстанда өткерилетуғын қоспа илажлар ҳәм экспертлик ушырасыўларда илимий, мәдений, музей ҳәм медиа жойбарлар бойынша анық усынысларды ислеп шығыў режелестирилген. Бул басламалар бирге ислесиўдиң узақ мүддетли бағдарламасына тийкар болады ҳәм оны әмелге асырыўдың әҳмийетли бағдарларын белгилеп береди.
