Изертлеўшилердиң баҳалаўынша, оғада жоқары температура бақланатуғын күнлер саны әдеттеги жылларға салыстырғанда 44 процентке артады.
Чикаго университетиниң хабар бериўинше, Эль-Ниньо менен байланыслы ыссылық 2026-жылдың июнь айынан 2027-жылдың февраль айына шекемги дәўирде пүткил дүнья бойлап қосымша 451 мың адамның өлимине себеп болыўы мүмкин.
"ЖМШ прогнозларына бола, бул ҳәдийсениң 2027-жыл февраль айына шекем даўам етиў итималы 100 процентке шамалас. Ол 1950-жылдан берли бақланған ең күшли ҳәдийселерден бирине айланыўы мүмкин", — деди шөлкем бас хаткери Селесте Сауло.
Жәҳән метеорология шөлкеми (ЖМШ) де Эль-Ниньо күшейиўде даўам етиўин ҳәм шама менен декабрь айында өзиниң ең жоқары ноқатына жетиўин мәлим етти, деп хабар берди корреспондент.нет.
Эль-Ниньо — дүнья бойлап ҳаўа-райына тәсир ететуғын тәбийий климат циклиниң жыллы басқышы. Ол глобал температураның көтерилиўине ҳәм үлкен аймақларда жаўын-шашынның әдеттеги бөлистирилиўиниң өзгериўине себеп болады. Айырым жерлерде бул қурғақшылыққа, басқа аймақларда болса күшли жаўынларға алып келеди. Әдетте, бул ҳәдийсе ҳәр еки жылдан жети жылға шекемги аралықларда қайталанады.
Синоптиклер бир неше айдан берли быйылғы Эль-Ниньо бақлаўлар тарийхындағы ең күшли ҳәдийсе болыўы мүмкинлигинен ескертип келмекте. Сол себепли бул қубылыс "супер Эль-Ниньо" деп аталмақта.
Тыныш океаны бетиндеги суў температурасы әдеттегидей көрсеткиштен 4 дәрежеге жоқары болды. Бул 1949-жылы бақлаўлар басланғанынан берли дизимге алынған ең жоқары көрсеткиш болып есапланады.
Сентябрь айында Эль-Ниньо жеделлесип, бақлаўлар тарийхындағы ең күшли дәрежеге жетти. Бул ҳаққында Япония метеорология агентлиги мәлим етти. Қәнигелердиң баҳалаўынша, бул климат ҳәдийсеси пүткил қыс даўамында сақланып қалады, деп жазады “The Independent” басылымы.
Қәнигелер декабрь айында өзиниң шыңына жетиўи күтилип атырған бул ири климат ҳәдийсеси себепли жүдә күшли ыссылық жүзеге келиўи мүмкин екенлигинен ескертпекте.
