Илажда Ақтаў қаласындағы дипломатиялық корпус, этномәдений орайлардың ўәкиллери, жәмийетлик ғайраткерлер, студентлер, ўатанласлар, сондай-ақ, Манғыстаў ўәлаяты ҳәкимлиги ҳәм орайлық китапхананың ўәкиллери қатнасты.
Илаж шеңберинде Өзбекстан Президентиниң басламасы менен апрель айы Әмир Темур айы деп жәрияланғаны, сондай-ақ, Ташкенттеги Ислам цивилизациясы орайында "Әмир Темур ҳәм Темурийлер цивилизациясының жәҳән тарийхы ҳәм мәдениятындағы орны ҳәм әҳмийети" атамасында халықаралық конференция өткерилиўи ҳаққында мағлыўмат берилди. Буннан тысқары, илимий басылымлар ҳәм ағартыўшылық илажларды шөлкемлестириў режелери билдирилди.
Қатнасыўшылар уллы сәркарда ҳәм мәмлекетлик ғайраткер Саҳыпқыран Әмир Темурдың дүнья тарийхына қосқан салмақлы үлесин, оның Орайлық Азия, Европа ҳәм Киши Азия мәмлекетлериниң раўажланыўындағы әҳмийетли ролин атап өтти.
Түркияның бас консулы Сабри Алптекин Әмир Темур дүнья жүзи тарийхында уллы мәмлекетлик ғайраткер, талантлы сәркарда, илим ҳәм мәденияттың қәўендерлери сыпатында белгили екенин атап өтти. Сондай-ақ, ол Әмир Темур ҳәм Темурийлер дәўири тарийхын ҳәр тәреплеме терең үйрениў, тарийхый ҳақыйқатлықты халықларға жеткериў дәўир талабы екенин атап өтти.
Буннан тысқары, қатнасыўшыларға Әмир Темур музейи, сондай-ақ, Қаршы ҳәм Самарқанд қалаларына барып, уллы тулғаның өмири, басқарған дәўири ҳәм қалдырған тарийхый мийрасы менен жақыннан танысыў усыныс етилди.
Илаж жуўмағында қатнасыўшылар Әмир Темур ҳәм Темурийлер дәўири ҳаққындағы билимлерди ғалаба ен жайдырыў бағдарында буннан былай да бирге ислесиўге келисип алды.
