Саўда үйи Беларусия Республикасы, Минск қаласы, Жеңимпазлар проспекти,
63В мәнзилинде жайласқан. Оның улыўма майданы 261,3 кв. м. Бул жерде
Өзбекстанда ислеп шығарылған товарлар турақлы түрде көрсетиледи ҳәм Беларусь
базарына көтере баҳаларда усыныс етиледи.
Ашылыў мәресиминде Өзбекстан Республикасы Бас министриниң орынбасары
Жамшид Хўжаев, Беларусь Республикасы Бас министриниң орынбасары Юрий Шулейко,
Өзбекстан Саўда-санаат палатасының баслығы Даврон Вахобов ҳәм Беларусь
саўда-санаат палатасының баслығы Михаил Мятликов қатнасты.
Мәресимде Даврон
Вахобов шығып сөйлеп, Саўда үйинде Өзбекстанда ислеп шығарылған электротехника,
турмыслық товарлар, тоқымашылық өнимлери ҳәм басқа да экспортқа бағдарланған
товарлардың бар екенлигин атап өтти. Сондай-ақ, ол Өзбекстан ҳәм Беларусь
арасындағы товар алмасыў көлеми ҳәзирги ўақытта 1 миллиард АҚШ долларына
жақынласқанын, еки мәмлекет басшылары бул көрсеткишти 2 миллиард долларға
жеткериў ўазыйпасын қойғанын атап өтти.
Саўда үйиниң
ашылыўы Өзбекстан өнимлериниң Беларусь базарындағы абырайын кеңейтиў,
жергиликли ислеп шығарыўшылар ушын жаңа имканиятлар жаратыў, еки мәмлекет
исбилерменлери арасында тиккелей байланысларды жолға қойыў, биргеликтеги
инвестициялық ҳәм өндирислик жойбарларды әмелге асырыў имканиятын береди.
Саўда үйиниң
шөлкемлестирилгени Өзбекстан ҳәм Беларусь саўда-санаат палаталары арасындағы
избе-из бирге ислесиўдиң әмелий нәтийжеси болды. Атап айтқанда, 2026-жыл
февраль айында Беларусь ҳүкимет делегациясының Өзбекстанға рәсмий сапары
шеңберинде тәреплер улыўма баҳасы дерлик 110 миллион АҚШ долларына тең болған
шәртнама ҳәм келисимлерге қол қойған еди.
