Ташкент ҳәм Самарқанд
қалаларында өтип атырған абырайлы форум 50 ге шамалас мәмлекеттен 300 ге
шамалас жетекши ғалаба хабар қуралларының ўәкиллери, илимпазлар, мәденият
хызметкерлери ҳәм санлы технологиялар тараўының қәнигелерин бирлестирди. "Euronews",
"CNN", "BBC" ҳәм
"Al Jazeera" сыяқлы дүньяның
жетекши медиа брендлериниң мәлимлеме бирге ислесиўшиси сыпатында қатнасыўы
илаждың халықаралық көлемин ҳәм әҳмийетин көрсетеди.
Өзбекстан ғәрезсизлигиниң
болажақ 35 жыллығына бағышланған форум мәмлекетимиздиң бай цивилизациялық
мийрасын дүнья жәмийетшилигине жаңа мазмунлы көринисте таныстырыў ушын әҳмийетли
халықаралық майданға айланды.
Шерзод Асадов өзиниң шығып сөйлеген сөзинде форум
Президент Шавкат Мирзиёевтиң басламасы менен шөлкемлестирилген Ислам
цивилизациясы орайында өткерилип атырғаны өзине тән рәмзий мәниге ийе екенин
атап өтти.
"Ислам цивилизациясы - бул, бәринен бурын, илим,
ағартыўшылық, пикир ҳәм кеңпейиллик цивилизациясы. Инсаният раўажланыўына үлкен
үлес қосқан уллы илимпаз ҳәм ойшылларымыздың мийрасы тек ғана тарийхый байлық
емес, ал заманагөй илим, мәденият ҳәм инновациялық раўажланыў менен тығыз байланыслы
болған жанлы интеллектуаллық мийрас болып есапланады".
Оның атап өтиўинше, бүгинги күнде бул бийбаҳа мийрасты
қәстерлеп сақлаў менен шекленип қалмастан, оны заманагөй санлы форматларда, жас
әўладқа түсиникли тилде ҳәм заманагөй медиа-шешимлерден пайдаланған ҳалда дүньяға
танытыў әҳмийетли. Миллий ҳәм халықаралық журналистика тарийхый ҳақыйқатты әдил
сәўлелендириў, стереотиплерди жеңип өтиў, халықлар арасында өз-ара исенимди
беккемлеўге хызмет етиўи керек.
"Биз бул форумды бир мәртелик илаж емес, ал узақ
мүддетли профессионал қарым-қатнас ҳәм бирге ислесиўдиң басланыўы сыпатында
қабыл етемиз. Оның шеңберинде болып өтетуғын пикир-таласлар ҳәм жаңа басламалар
Өзбекстанның уллы цивилизациялық мийрасын дүнья мәлимлеме мәканында мүнәсип
көрсетиўге хызмет етеди, деп исенемен. Форум жумысына табыслар тилеймиз!",
- деп атап өтти Шерзод Асадов.
