Бутун халқимиз сўнгги бир неча кунлар ичида Ўзбекистон миллий терма жамоасининг футбол бўйича жаҳон чемпионатидаги илк иштирокини томоша қила туриб фахру хавотир, кўз ёшию ҳайратдан иборат ҳис-туйғулар оғушида ана шундай ҳаяжонли лаҳзаларда яшади.
Бу кунлар, шубҳасиз, халқимиз хотирасида янги даврнинг бошланиши, узоқ йиллик орзулар рўёби ва албатта, келажак сари ташланган дадил қадам сифатида муҳрланди. Дунёнинг энг нуфузли футбол мусобақасида илк бор Ўзбекистон байроғи ҳилпирагани, мадҳиямиз янграгани, футболчиларимиз жаҳон футболининг энг йирик саҳнасида мамлакатимиз шарафини мардонавор ҳимоя қилгани миллий спортимиз тарихида ўчмас из қолдирди.
Тошкент халқаро аэропортида мундиалдаги иштирокини якунлаб, ватанимизга қайтиб келган чарм тўп усталаримизни мутасаддилар, футболчиларнинг оила аъзолари, кенг жамоатчилик, оммавий ахборот воситалари ходимлари ҳамда мухлислар иштирокида кутиб олиш маросими бўлиб ўтди.
Унда сўзга чиққанлар ушбу тарихий иштирок юртимизда спортга, хусусан, футболга қаратилаётган улкан эътибор самараси эканини яна бир бор қайд этиб, мундиал кунлари футбол бутун халқни ягона туйғу атрофида бирлаштирган улкан маънавий ҳодисага айланганини алоҳида қайд этди.
Дарҳақиқат, юртимизнинг турли ҳудудларида, дунёнинг қайси бурчагида яшашидан қатъи назар, ватандошларимиз бир вақтда битта жамоага мухлислик қилди, ҳар бир вазиятни ҳаяжон билан кузатди. Марказий Осиёдаги қардош халқлар, туркий давлатлар жамоатчилиги ҳам Ўзбекистон терма жамоасини чин дилдан қўллаб-қувватлади. Футбол майдонида бошланган ана шу бирдамлик туйғуси халқларни бир-бирига янада яқинлаштирадиган, ўзаро ишонч ва дўстликни мустаҳкамлайдиган муҳим омил сифатида намоён бўлди.
Жаҳон чемпионати ҳар қандай жамоа учун ўзига хос синов майдони саналади. Бу ерда ҳар бир ўйин алоҳида ёндашувни талаб қилади, биргина кичик эпизод ҳаммасини ҳал қилиб қўйиши мумкин. Ўзбекистон миллий терма жамоаси ҳам АҚШ ва Мексика майдонларида ўтган баҳсларда айнан шундай муҳитни бошдан кечирди. ФИФА рейтингида дунёнинг етакчи жамоалари қаторидан ўрин олган Португалия ва Колумбия, таркибида Европанинг нуфузли клубларида тўп сураётган футболчилар жамланган Конго ДРга қарши ўйинлар жамоамиз учун катта тажриба мактаби бўлди.
Президентимиз 30 июнь куни мамлакатимиз ёшлари билан учрашувда Ўзбекистон миллий терма жамоасининг футбол бўйича жаҳон чемпионатидаги иштирокига тўхталиб ўтар экан, айни шу жиҳатларни қайд этиб, жумладан, “Миллий терма жамоамизнинг жаҳон чемпионатидаги иштироки тўғрисида турли фикрлар билдирилмоқда. Лекин Ватанимиз шарафини ҳимоя қилган терма жамоамиз аъзоларига ортиқча ҳис-туйғу билан эътироз билдириш, улардан айб қидириш халқимизга хос иш эмас. Аксинча, бугун уларни қўллаб-қувватлаш, руҳини кўтариш ҳар қачонгидан ҳам муҳим”, дея таъкидлади.
Катта ғалабалар ҳали олдинда экани, бунинг учун футболни ривожлантиришга янада кенг шароитлар яратилиши, бу соҳага инвестиция кўпайтирилиши таъкидланди. Энг аввало, болалар футболига эътибор кучайтирилиб, мазкур спорт умуммиллий ҳаракатга айлантирилади. Келаси йилнинг январида Саудия Арабистони майдонларида ўтказиладиган футбол бўйича Осиё кубогига тайёргарлик ҳозирдан бошланади. Давлатимиз раҳбари таъкидлаганидек, биз жамоамизга ишонамиз ва ушбу мусобақада ҳам бутун халқимиз билан қўллаб-қувватлаймиз!
Яна бир муҳим жиҳат. Футболимиз тарихида жаҳон чемпионатидаги дастлабки голларимиз алоҳида воқелик бўлди. Аббос Файзуллаев ва Элдор Шомуродов томонидан киритилган голлар миллионлаб юртдошларимиз қалбида унутилмас қувонч уйғотди. Айниқса, Элдор Шомуродовнинг Конго ДР дарвозасига йўллаган ажойиб зарбаси ФИФА томонидан гуруҳ босқичининг энг чиройли голи сифатида эътироф этилгани миллий футболимиз учун ўзига хос ютуқдир. Бундай эътироф Ўзбекистон футболчилари энг йирик майдонларда ҳам юксак индивидуал маҳоратини намойиш эта олишини бутун дунёга кўрсатди десак, адашмаймиз.
— Барча футболчилар жаҳон чемпионати майдонида охирги дақиқагача бор кучи ва имкониятини ишга солди. Натижа кўнгилдагидек бўлмади, бунинг учун, албатта, мухлисларимиздан узр сўраймиз, — деди терма жамоамиз сардори Элдор Шомуродов. — Шу билан бирга, бу мундиал Ўзбекистон футболи учун жуда катта мактаб, бутун мамлакатимиз учун эса муҳим ютуқ бўлди деб ўйлайман. Футбол туфайли халқимиз бир тану бир жон бўлди, миллионлаб юртдошларимиз битта мақсад, битта орзу атрофида жипслашди. Ана шу бирдамлик, халқимизнинг ишончи ва қўллаб-қувватлаши биз учун энг катта куч бўлди. Биз бу ишончни қадрлаймиз ва келгусида мухлисларимизни янада кўпроқ хурсанд қилиш учун бор кучимиз билан ишлашда давом этамиз.
Шундай экан, миллий терма жамоамизнинг жаҳон чемпионатидаги илк иштироки якунланган бўлса-да, аслида миллий футболимиз учун янги босқич энди бошланди. Жаҳон чемпионатидаги дебютимиз эса миллионлаб ёшлар қалбида янги орзуларни уйғотди, футбол билан шуғулланиш истагини янада кучайтирди, юртимизда ушбу спорт турининг нуфузи ва таъсирини янги босқичга олиб чиқди. Энг муҳими, халқимиз ўз жамоасига бўлган ишончини янада мустаҳкамлади. Ишонч бор жойда интилиш бўлади, интилиш бор жойда эса тараққиёт давом этади. Демак, мундиалда бошланган тарих ҳали ўзининг энг ёрқин саҳифаларини ёзишга улгурмаган. Олдинда Ўзбекистон футболини бундан-да улкан зафарлар сари етаклайдиган янги марралар кутмоқда. Ишонамизки, бу — ҳали катта йўлнинг бошланиши, холос!
Аслиддин АБДУРАЗЗОҚОВ,
“Янги Ўзбекистон” мухбири
