Ғалаба эвазига Cerberus Марказий Евроосиё номидан 2026 йил 13–15 октябрь кунлари Сан-Францискода бўлиб ўтадиган TechCrunch Startup Battlefield 200 финалида иштирок этиш ҳуқуқини қўлга киритди.
Бу йил дастурда иштирок этиш учун 39 мамлакатдан 726 та ариза келиб тушди. Миллий саралаш босқичлари якунига кўра, 22 та энг истиқболли стартап минтақавий финалга йўл олди. Ўзбекистон номидан Cerberus, MoliyAI, Sino AI, Deepen, Fermopolis ва Oqim App каби олтита лойиҳа иштирок этди.
Минтақавий финал 12 август куни бўлиб ўтди. Энг кучли учликдан, шунингдек, Қозоғистоннинг WeGlobal AI ва Япониянинг LOOQ стартаплари жой олди. Улар Cerberus билан биргаликда танловнинг глобал босқичига йўлланма олди.
Cerberus — сунъий интеллект ёрдамида корпоратив IT-тизимлардаги заифликларни автоматик аниқлашга мўлжалланган киберхавфсизлик ечими. Лойиҳа AI ёрдамида хавфсизлик текширувларини автоматлаштириш, шунингдек, сунъий интеллект ҳаракатларини белгиланган доирада бошқариш имконини берувчи технологияларни ишлаб чиқмоқда. 2026 йилда стартап халқаро 500 Global venchur фондидан ҳам инвестиция жалб қилган.
Ғолиблар умумий қиймати 100 000 АҚШ долларини ташкил этувчи инвестицион мукофот жамғармасини қўлга киритади. Маблағ учта совринли ўрин ўртасида тақсимланади: биринчи ўрин учун — 50 000 доллар, иккинчи ўрин учун — 30 000 доллар, учинчи ўрин учун эса — 20 000 доллар. Инвестициялар Astana Hub Ventures, IT Park Ventures ва Silkroad Innovation Hub томонидан тақдим этилади.
Бундан ташқари, OpenAI ҳам худди шу нисбатда жами 100 000 АҚШ доллари миқдорида API кредитлари ажратади. Кучли учлик TechCrunch Startup Battlefield 200 саҳнасида чиқиш қилиш, TechCrunch Disrupt 2026 кўргазма майдонида тадбирнинг барча уч куни давомида ўз лойиҳаларини намойиш этиш имкониятига эга бўлади. Шунингдек, ҳар бир жамоанинг икки нафар аъзоси учун Сан-Францискога авиачипта ва бир ҳафтагача яшаш харажатларини ўз ичига олган тўлиқ молиялаштирилган сафар тақдим этилади. IT Park Uzbekistan Road to TechCrunch Startup Battlefield 2026 танловининг минтақавий босқичини ташкил этиш ва қўллаб-қувватлашда асосий ҳамкорлардан бири сифатида иштирок этди.
Глобал босқичда Cerberus жамоаси ўз технологик ечимини халқаро инвесторлар, венчур фондлари ва глобал технологик ҳамжамият вакилларига тақдим этади. Startup Battlefield бутун дунёдан истиқболли, эрта босқичдаги стартапларни бирлаштириб, уларга халқаро инвесторлар эътиборини жалб қилиш ва глобал бозорда ўзини намоён этиш имкониятини тақдим этади.
