Давлатимиз раҳбари амалдаги Олимпиада чемпиони Ҳиндистон терма жамоаси билан учрашувга алоҳида тўхталди. Нодирбек Ёқуббоевнинг Ниҳал Саринга қарши партиясида вазият бир пайт жуда оғирлашганини эслади.
– Лекин сен охиригача мардона курашдинг. Ниҳоятда топқирлик билан қўллаган тактик юришларинг вазиятни бутунлай ўзгартирди ва жамоамизга ҳал қилувчи ғалабани олиб келди, – деди Президентимиз.
Ҳиндистон устидан ғалабадан сўнг Ўзбекистон якка пешқадамга айланди. Кейин шахматчиларимиз Хитой жамоасини 3:1 ҳисобида мағлуб этиб, жаҳон рейтинги етакчиси ва олти карра Олимпиада чемпиони бўлган АҚШ терма жамоасидан ҳам устун келди.
Президентимиз Нодирбек Абдусатторов бутун мусобақани мағлубиятсиз ўтказиб, биринчи тахтада олтин медални қўлга киритганини эътироф этди. Унинг америкалик Фабиано Каруанага қарши мураккаб эндшпильдаги ғалабаси ҳам алоҳида эсга олинди:
“Бунинг ўзи алоҳида катта натижа!”.
