Ин чорабинӣ тақрибан 14 ҳазор намояндаи ихтироъкорони ҷавонро
аз кишварҳои аъзои Созмони ҳамкории Шанхай ва дигар давлатҳо муттаҳид намуд.
Дар доираи фестивал намоишгоҳҳо, олимпиадаҳо ва озмунҳо
аз рӯи 9 самти муосири муҳандисӣ, аз ҷумла авиатсия, агротехнология, мошинсозӣ,
робототехника, энергетикаи «сабз», меъморӣ ва муҳандисии тиббӣ баргузор
гардиданд. Аз рӯи натиҷаҳо эълон шуд, ки консорсиуми илмии «Муҳандисони оянда»
таъсис дода мешавад.
Ташкилкунандаи чорабинӣ Вазорати таҳсилоти олӣ, илм ва
инноватсияҳои Ҷумҳурии Ӯзбекистон буд. Дар он роҳбарони вазоратҳои маориф, илм
ва инноватсия, ректорони донишгоҳҳои кишварҳои аъзои СҲШ, намояндагони Котиботи
СҲШ, СММ ва Федератсияи ҷаҳонии ташкилотҳои муҳандисӣ иштирок карданд.
Дар ин озмуни байналмилалӣ донишҷӯёни Ӯзбекистон имкониятҳои
худро муносиб нишон доданд. Аз ҷумла, донишҷӯёни Донишкадаи давлатии техникии
Олмалиқ дар 9 самти муҳандисӣ 3 ҷойи ифтихориро соҳиб шуданд.
Дастаи «ASTRYX» роҳхат ба мусобиқаи байналмилалии First
Tech Challenge «China Championship 2026»-ро ба даст овард. Дастаи «Муҳандиси
металлург» ҳамчун ғолиби озмуни «Эстафетаи механизмҳо» сатҳи баланди дониш,
инноватсия ва кори дастаҷамъонаро нишон дод. Дар самти робототехника донишҷӯён
дар озмуни «Роботҳои гуманоид» ҷойи сеюмро гирифтанд ва ба ҳайати тими миллии Ӯзбекистон
қабул шуданд.
Дастовардҳои донишҷӯёни Донишкадаи давлатии техникии
Олмалиқ, ки имрӯз дар он равандҳои васеи ислоҳот амалӣ мешаванд, на танҳо натиҷа,
балки намунаи равшани меҳнати пайваста, омӯзиш, ҷустуҷӯи илмӣ ва тафаккури воқеии
муҳандисӣ мебошанд.
Ин муваффақиятҳо танҳо оғози роҳанд. Ҷавононе, ки ба
дониш майл доранд ва дар муборизаи зеҳнӣ обутоб меёбанд, созандагони оянда
мебошанд.
