Дар чорабинӣ вазири сармоягузорӣ, саноат ва савдои Ӯзбекистон Лазиз Қудратов, муовини Сарвазири Тоҷикистон Зиёзода Сулаймон Ризоӣ ва вазири саноат ва технологияҳои нави Тоҷикистон Шералӣ Кабир иштирок намуданд.
Намоишгоҳ бо масоҳати 1300 метри мураббаъ ба як майдони муҳим барои муаррифии иқтидори саноатии ду кишвар табдил ёфт. Аз ҷониби Ӯзбекистон зиёда аз 180 ширкат аз 15 соҳа, аз ҷумла нассоҷӣ, электротехника, дорусозӣ ва саноати автомобилсозӣ иштирок намуда, беш аз 450 намуди маҳсулотро пешниҳод карданд. Аз Тоҷикистон бошад, зиёда аз 30 ширкат аз 10 бахш бо тақрибан 200 номгӯи маҳсулот ҳузур доранд.
Ин намоишгоҳ, ки то 27 март идома мекунад, ба таҳкими ҳамкории саноатӣ миёни ду кишвар равона шудааст. Ҳар рӯз иштироки беш аз 500 намояндаи соҳибкорӣ ва иттиҳодияҳои соҳавӣ дар назар аст.
Барномаи чорабинӣ вохӯриҳо дар шаклҳои B2B ва G2B, муаррифии имкониятҳои содиротӣ, инчунин музокироти мушаххас барои бастани шартномаҳои тиҷоратӣ ва созишномаҳои шарикии дарозмуддатро дар бар мегирад.
