Hajga yuborish uchun 26 ming dollar talab qilgan shaxs qo‘lga olindi

Ijtimoiy hayot 20 apr 2026, 10:01 1 794

Maʼlumki, Haj tadbiri Din ishlari bo‘yicha qo‘mitasi hamda Saudiya Arabistoni Podshohligi Haj vazirligi o‘rtasida har yili imzolanadigan shartnoma asosida O‘zbekiston musulmonlari idorasi tomonidan tashkil etiladi.

Shunga qaramasdan, ayrim shaxslar ishonuvchan fuqarolarni aldab, katta pul evaziga ularni Saudiya Arabistoniga olib borish bo‘yicha noqonuniy va shubhali takliflar bildirish holatlari ham uchramoqda.

Jumladan, Namangan shahrida yashovchi 1984 yilda tug‘ilgan shaxs Chust tumanida istiqomat qiluvchi 4 nafar fuqaroni «Haj–2026» mavsumida noqonuniy yo‘llar orqali Saudiya Arabistoniga yuborish evaziga 26 ming AQSh dollari talab qilgan.

Davlat xavfsizlik xizmati hamda Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbırda ushbu shaxs talab qilingan mablag‘ning 6 ming AQSh dollarini olgan vaqtda ashyoviy dalillar bilan qo‘lga olindi.

Hozirda unga nisbatan Jinoyat kodeksining 168-moddasi (firibgarlik) 4-qismi «a» bandi bilan jinoyat ishi qo‘zg‘atilib, tergov harakatlari olib borilmoqda.