Ma’lum qilinishicha, Davlat xavfsizlik xizmatining Toshkent shahar bo‘yicha boshqarmasi xodimlari tomonidan IJQQD bilan hamkorlikda o‘tkazilgan tadbirda Bektemir tumani soliq inspeksiyasining sho‘ba boshlig‘i mahalliy tadbirkordan pora talab qilgani aniqlangan.

U xaridorga savdo cheki berilmagani haqida kelib tushgan murojaat yuzasidan ma’muriy bayonnoma rasmiylashtirmaslik va ishni sudga yubormaslik evaziga 4 mln so‘m talab qilgan.

Mansabdor ushbu mablag‘ni soliq inspeksiyasi inspektori orqali olgan vaqtda ashyoviy dalillar bilan qo‘lga olingan.

Shuningdek, tergovga qadar tekshiruv davomida mazkur inspektor joriy yil aprel oyida ham xuddi shu do‘kon bo‘yicha kelib tushgan murojaatni ko‘rmasdan qoldirish evaziga 1,5 mln so‘m olgani ma’lum bo‘lgan.

Hozirda mazkur holat yuzasidan soliq organi xodimlariga nisbatan jinoyat ishi qo‘zg‘atilib, tergov harakatlari olib borilmoqda.