2022-yilda jami 385 437 nafar maktab bitiruvchilaridan 295 393 nafari, yoki 77 foizi oliy ta’lim muassasalariga kirish imtihonlarida ishtirok etgan. Ularning 85 869 nafari yoki 23 foizi davlat oliy ta’lim muassasalariga o‘qishga qabul qilingan bo‘lib, bu ko‘rsatkich 2021-yilga nisbatan  4 foizga, 2020-yilga nisbatan 12 foizga oshgan.
 
Xo‘sh, test sinovlaridagi o‘rtacha ball ko‘rsatkichlari qanday bo‘ldi?
 
Mamlakatimiz miqyosida maktab bitiruvchilarining test sinovlaridagi o‘rtacha ball ko‘rsatkichi 76,1 ballni tashkil etgan, bu natija 2021-yilga nisbatan 1,2 ball, 2020-yilga nisbatan 6,3 ballga oshgan (2020-yilda 69,8 ball, 2021-yilda 74,9 ball).
 
Past ko‘rsatkichli maktablar alohida nazoratga olindi.
 
Maktab bitiruvchilarining o‘rtacha ball ko‘rsatkichlari bo‘yicha o‘tish balidan past (56,7 balldan) bo‘lgan yurtimizdagi 519 ta umumta’lim maktab hozirda alohida nazoratga olingan, ularda o‘quv-tarbiya jarayonlarini yaxshilash, pedagoglarning kasbiy mahorati va salohiyatini oshirish borasida manzilli ishlar amalga oshirilmoqda.
 
Shu o‘rinda maktablarda ta’lim sifatini oshirish zarurligini inkor qilmagan holda, yo‘lga qo‘yilayotgan islohotlar va jarayonlar natijasi bir kunda amalga oshmasligi hamda maktab bitiruvchilarining test sinovlaridagi o‘rtacha ball ko‘rsatkichlari natijasi yildan yilga yaxshilanib borayotganligini aytib o‘tish joizdir.