Райондағы Мектепке шекемги ҳәм мектеп билимлендириўи бөлимине қараслы 1-санлы улыўма орта билим бериў мектеби өзиниң 55 жыллық юбилей жасын белгиледи.

Илажға, Қарақалпақстан Республикасы Жоқарғы Кеңесиниң депутаты У.Жалменов, район ҳәкиминиң орынбасары А.Бекмуратов, Мектепке шекемги ҳәм мектеп билимлендириўи бөлиминиң баслығы Н.Қурбаниязов, нураний устазлар, муғаллимлер ҳәм мектеп оқыўшылары қатнасты.

Атап өтилгениндей, елимизде, соның ишинде, Шоманай районында жас әўладтың сапалы билим алыўы, халқына пайдалы инсанлар болып жетилисиўи ушын барлық мүмкиншиликлер иске қосылып, муғаллим ҳәм устазлардың дүнья стандартлары тийкарында жасларға заманагөй билим бериўи ушын барлық шараятлар жаратылмақта. Бул мектеп те соңғы жылларда жасларға билим бериў сапасының арттырылыўы бойынша жақсы нәтийжелерге ерисип келмекте.

Илажда мектепте көп жыл устазлық еткен нуранийлар, мектеп питкериўшилери де шығып сөйлеп, жасларға өзлери оқыған жыллардағы мектептеги шараятларды мысаллар менен атап өтип, оларға жаратылып атырған шараятлардан утымлы пайдаланыўы, жақсы билим алып кәмилликке ерисиўин мәсләҳәт етип, жақсы тилеклерин билдирди.

Байрам илажында мектеп тарийхынан көринислер көрсетилип, оқыўшылардың көркем шығыўлары, музыкалық аяқ ойынлары тамашагөйлер нәзерине усынылды.

Қарақалпақстан хабар агентлиги.