Ушырасыўда Өзбекстан парламенти ҳәм Европа парламенти арасындағы өз-ара бирге ислесиўди жаңа басқышқа алып шығыў, әҳмийетли регионаллық ҳәм глобаллық мәселелер бойынша пикир алысыў, тәжирийбе ҳәм мәлимлемелер менен өз-ара алмасыўды даўам еттириў мәселелери додаланды.
Сөйлесиў ўақтында Самарқанд қаласында өткерилген "Орайлық Азия - Европа Аўқамы" биринши саммити еки регион арасындағы өз-ара исеним ҳәм турақлы қарым-қатнасты беккемлеўде әҳмийетли тийкар болғаны айрықша атап өтилди.
Сондай-ақ, Ташкент қаласында апрель айында табыслы өткерилген Парламентлераралық аўқамның 150-юбилей ассамблеясында Европа мәмлекетлери парламенти ўәкиллериниң белсене қатнасқаны, Ассамблея шеңберинде қабыл етилген ҳүжжетлердиң Европа Аўқамы тәрепинен қоллап-қуўатланғаны жоқары баҳаланды.
Тәреплер сиясий сөйлесиўди избе-из даўам еттириў, нызамшылық процесинде алдынғы көзқарасларды алмасыў ҳәм парламентлераралық байланысларды беккемлеў бағдарындағы ҳәрекетлерди жеделлестириўге таяр екенин билдирди, деп хабар береди Олий Мажлис Сенатының баспасөз хызмети.
