Мәмлекетимизде халық ушын мүнәсип турмыс шараятын жаратыў, заманагөй, қолайлы турақ жайлар қурыў бойынша жумыслар избе-из кеңеймекте. Президентимиздиң 2021-жыл 12-октябрьдеги пәрманына муўапық, "Жаңа Өзбекстан" массивлерин қурыў ҳәм аймақларды социаллық-экономикалық раўажландырыў илажлары әмелге асырылмақта.
Заманагөй қала қурылысы талаплары тийкарында әмелге асырылып атырған усындай жойбарлардан бири Сурхандәрья ўәлаятының Жарқорған районында әмелге асырылмақта.
Өзлестирилип атырған 50 гектар майданда 116 көп қабатлы турақ жай қурыў режелестирилген. Ҳәзирги күнге шекем поликлиника, 180 орынлық бақша, 330 орынлық мектеп ҳәм мәҳәлле имараты пайдаланыўға тапсырылып, 68 турақ жайдағы 1 мың 500 квартирада халық турақ жайға ийе болды.
Мәлимлеме технологиялары ҳәм инглис тили бойынша оқыў орайы да жумыс баслады, 7 микро орай, 5 саўда ҳәм турмыслық хызмет көрсетиў объекти қурылды. Ишимлик суўы ҳәм ыссылық тармақлары тартылды, дерлик 3 километр газ тармағы тартылды, 250 киловатт қуўатлылыққа ийе трансформатор орнатылды. 4,5 гектар майданға саяманлы ҳәм мийўели тереклер, 300 гектар шөл аймағына сексеўил егилген.
Келешекте және 50 ге шамалас турақ жайдың қурылысы режелестирилген. Атап айтқанда, усы жылы 280 квартиралы 14 көп қабатлы турақ жай қурыў, жаңа жоллар қурыў, көклемзарластырыў ҳәм дем алыў бағын шөлкемлестириў режелестирилген.
Президентимиз аймақта жумыс алып барып атырған "Жаңа жаслар" сервис басқарыў компаниясының жумысы менен танысты. Компания райондағы 161 көп қабатлы жайға хызмет көрсетеди, соннан 54 и бул массивте жайласқан. Турақ жайлардың төбесинде 5 киловатттан 15 киловаттқа шекем қуяш панеллери орнатылған.
Инклюзив билимлендириў ҳәр бир баланың физикалық ҳәм интеллектуаллық өзгешеликлерине қарамастан, мектепке барыў ҳәм сапалы билим алыў имканиятын тәмийинлеўди нәзерде тутады.
Мәмлекетимиз басшысы 66-мектепте жаратылған шараятлар, майыплығы болған балалар ушын жаратылған имканиятларды көзден өткерди. Бүгинги күнде бул жерде 500 ден аслам оқыўшы билим алмақта. Айрықша жәрдемге мүтәж балаларды оқытыў ушын заманагөй стандартларға муўапық өз алдына қатнаслар енгизилип, 50 ге шамалас қәниге ҳәм педагоглар жумыс алып бармақта. Мектеп ҳәўлиси, дәлизлер, оқыў ханалары, асхана, спорт залы ҳәм емлеў ханалары зәрүр шараятлар менен тәмийинленген.
Президентимиз жаратылған инфраструктура менен танысып, жаслардың турмысы ҳәм келешеги ушын жасалма интеллект ҳәм санластырыўға байланыслы бағдарлардың әҳмийетли екенлигин атап өтти.
- Мектеп билимлендириўинде жасалма интеллектке оқытыў бағдарламаларын енгизип атырғанымыз бийкарға емес: оқыўшылар жоқары оқыў орынларына ҳәм мийнет базарына келешек кәсиплерине таяр болып кириўи әҳмийетли,-деди Президент.
Буннан соң мәмлекетимиз басшысы массивте шөлкемлестирилген шет тиллери ҳәм мәлимлеме технологиялары оқыў орайын барып көрди.
6,5 миллиард сум қаржы есабынан қурылған 400 орынлық комплексте жылына 2 мыңнан аслам жаслар билим алып, жойбарлар үстинде ислеў имканиятына ийе. 200 ге шамалас тыңлаўшылар компьютер саўатлылығы ҳәм front-end курсларын табыслы тамамлап, сертификатларға ие болды. 150 ге шамалас оқыўшылар IELTS имтиханларында В2 ҳәм оннан жоқары нәтийжелерди көрсеткен. Орайда 20 ға шамалас қәниге жумыс ислейди.
Президентимиз жасларды билимлендириўге, соның ишинде, шет тиллерин үйрениўге тартыўға қаратылған бундай комплекслердиң әҳмийетине айрықша тоқтап өтти.
- Бүгин бундай орайлардың умтылысларын қоллап-қуўатлаў, керек болса, олардың ҳәрекетлерин бирлестирип, сырт елли шериклер менен байланысларды жолға қойыў зәрүр. Сонда ата-аналар балаларын исеним менен усындай орайларға оқыўға береди, - деди Президент.
Бәҳәр айы жақынлаған сайын аймақларда халық сейиллерин өткериў жақсы дәстүрге айланған. Президентимиз бул жерде сүмелек сейилинде қатнасып, халықтың кеўлин көтерди, олардың қызғын пикир-усынысларын тыңлады.
- Бүгин дүнья жәмийетшилиги Өзбекстанға ҳүрмет пенен қарап, халқымыз ушын жаратылып атырған шараятларды көрип, реформалардың нәтийжелилигине исеним пайда етпекте. "Жаңа Өзбекстан" массивлери адамлардың абадан, ықшам турақ жайларда жасаўы ушын қурылмақта. Мен билимлендириўдиң әҳмийетин бәрқулла атап өтемен: билим ҳәм дөретиўшилик мийнет арқалы мәмлекетимиздиң абырайын және де арттырамыз, дүньяда мүнәсип орын ийелеймиз. Сурхандәрьяның халқы мийнеткеш ҳәм кеңпейил, бул жерде еле көплеген жаңа басламаларды әмелге асырмақтамыз, - деди Президент.
