Глобал тармақ билим алыў күнделикли турмыстың ажыралмас бөлеги болған дүньяның жедел қалаларын - мектеплерде, жумыс орынларында, китапханаларда, үйлерде ҳәм жәмийетлик мәканларда бирлестиреди. Шөлкемниң қарары менен дүньяның 45 мәмлекетинен 70 қала тармаққа қосылды, деп хабар бермекте "Дунё" МА.
Тармақтың ўазыйпасы қалалар арасында сөйлесиў ҳәм тәжирийбе алмасыў, шериклик қатнасықларын беккемлеў, потенциалды арттырыў ҳәм бул тараўдағы жетискенликлерди тән алыў қуралларын ислеп шығыў арқалы турмыс даўамында оқытыў әмелиятын қоллап-қуўатлаў ҳәм жеделлестириўден ибарат.
Нөкис ҳәм Самарқандтың қосып алыныўы бул қалаларда ҳәр қыйлы жастағы инсанлар ушын билимлендириўди раўажландырыўға қаратылған реформалардың табысларының халықаралық тән алыныўы болып есапланады.
ЮНЕСКОның айрықша атап өтиўинше, Нөкисте жаслар, ҳаял-қызлар ҳәм халықтың жәрдемге мүтәж қатламларының талапларын есапқа алатуғын пүткил өмир даўамында оқытыўдың инклюзив экосистемасын жаратыў бойынша сезилерли жетискенликлерге ерисилди.
Самарқандта шөлкем Үзликсиз билимлендириўди раўажландырыў бағдарламасының әмелге асырылыўы, заманагөй билимлендириў мәкемелериниң ашылыўы, «Bilim Samarkand» санлы платформасының иске қосылыўы, инклюзив техникалық ҳәм профессионал билимлендириў имканиятларының кеңейиўин қоллап-қуўатлайды.
