Жоқары мәртебели мийманларға бул бийбаҳа естеликлердиң тарийхы, архитектуралық өзгешеликлери, Шығыста илим, мәденият ҳәм қала қурылысының раўажланыўындағы әҳмийети ҳаққында толық мағлыўмат берилди.
Сапар Исмайыл Саманий тәрепинен қурылған Саманийлер мақбарасынан басланды. Бул естелик 1993-жылы ЮНЕСКОның Пүткилжәҳән мийрасы дизимине киргизилген.
Буннан соң жетекшилер әсирлер даўамында Бухараның сиясий ҳәм ҳәкимшилик орайы болған әййемги қала - Арк қорғанына барды. Археологиялық ҳәм тарийхый мағлыўматлардың көрсетиўинше, қала узақ ўақыт даўамында қәлиплескен ҳәм соңғы көринисинде Бухара ҳүкимдарларының резиденциясы болған. Бүгин Арк қаланың тийкарғы белгилеринен бири ҳәм Бухараның тарийхый орайының әҳмийетли бөлеги болып қалмақта.
Пойи Калон комплекси Орайлық Азияның ең саўлатлы архитектуралық комплекслеринен бири. Оның доминанты 1127-жылы қурылған атақлы Минораи Калон болып, ол әсирлер даўамында тек Бухараның архитектуралық вертикалы емес, ал қаланың ҳақыйқый символы болып хызмет еткен.
Сондай-ақ, комплекс қурамына XVI әсирдиң басларында қурылған Қалан жомъе мешити ҳәм Мир Араб медресеси киреди. Бул комплекс ҳақылы түрде тарийхый Бухараның шайбанийлер дәўириндеги ең үлкен дүрданаларынан бири болып есапланады.
Әййемги Бухараның ең белгили жәмийетлик орынларынан бири болған, әййемги суў бассейни әтирапында қәлиплескен Лаби Ҳовуз комплекси жоқары мәртебели мийманларда айрықша тәсир қалдырды.
Оның қурамына Кўкалдош медресеси, Ханак ҳәм Надир Дийўанбеги медреселери киреди. Әсирлер даўамында қаланың бул мүйеши халық, саяхатшылар ҳәм илимпазларды өзине тартатуғын орын болып, орта әсирлердеги Бухараның бийтәкирар орталығын ҳәзирги күнге шекем сақлап қалған.
Сапар даўамында халық өнерментшилиги үлгилери, дәстүрий безеў көркем өнериниң элементлери, естеликлерди көркемлеп безеўдиң өзине тән өзгешеликлери де көрсетилди.
Әзербайжанлы мийманларға Бухараның Уллы жипек жолындағы ислам цивилизациясы, илим, ағартыўшылық ҳәм саўданың ең ири орайларынан бири сыпатындағы көп әсирлик тарийхы ҳаққында айтып берилди.
