Атап өтилиўинше, усы жылдың 6-7-май күнлери Италияның Милан қаласында болып өткен Азия раўажланыў банки Басқарыўшылар кеңесиниң 58-жыллық мәжилисинде Өзбекстан Республикасы делегациясы Бас министрдиң орынбасары Жамшид Ходжаевтың басшылығында қатнасты.
Сапардың тийкарғы нәтийжеси - 2025-2026-жыллар даўамында АРБ Басқарыўшылар кеңеси баслығының ўәкиллиги Өзбекстанға өтетуғыны ҳаққында рәсмий жәрияланыўы болды. Жамшид Хўжаев Кеңес баслығы сыпатында тастыйықланды, бул болса Өзбекстанға жетекши халықаралық финанс институтлары тәрепинен билдирилип атырған жоқары исенимниң айқын дәлили болды.
Мәжилис жуўмақларына бола, АРБ Басқарыўшылар кеңесиниң 59-жыллық мәжилисин 2026-жыл май айында Самарқанд қаласында өткериў ҳаққында бир аўыздан қарар қабыл етилди.
Илаж шеңберинде 2025-2026-жыллар ушын улыўма баҳасы 3,6 миллиард доллар болған 23 жаңа жойбарды әмелге асырыў бағдарламасына қол қойылды. Жойбарлар билимлендириў, ишимлик суўы тәмийнаты, транспорт ҳәм финанслық-техникалық жәрдем тараўлары сыяқлы социаллық-экономикалық раўажланыўдың тийкарғы бағдарларын қамтып алады.