Әзелден бир-бирине мүриўбетли болған халқымыз, өтип атырған ҳәр бир күнинде адамларға жақсылық ислеўге ҳәрекет етеди. Әсиресе, бундай қайырқомлық илажлары ҳәр қыйлы байрам сәнелеринде ғалаба түске енеди.
3-декабрь – халықаралық майыплар күни мүнәсибети менен Тахтакөпир районында өткерилген қайырқомлық илажы өткерилди.
Байрам мүнәсибети менен өткерилген бул кешеге тийкарынан аймақтағы социаллық жəрдемге мүтəж ҳəм физикалық имканияты шекленген пуқаралар қатнасты.
Илажда район ҳәкими Ж.Адилов, «Нураный» қоры Тахтакөпир районы бөлими баслығы Е.Бегманов, сектор басшылары шығып сөйлеп, қатнасыўшыларды сәне мүнәсебети менен қутлықлады ҳәм соңғы жыллары елимизде Президентимиздиң арнаўлы пәрман ҳәм қарарлары тийкарында халықты социаллық жақтан қоллап-қуўатлаў, соның ишинде физикалық имканияты шекленген пуқараларға ҳәр тәреплеме жәрдем көрсетиў бойынша исленип атырған жумысларды мақтаныш пенен айтып өтти. Олардың шаңарақларына аманшылық, өзлерине беккем денсаўлық тилеп, район ҳәкимлиги тәрепинен таярланған байрам саўғалары тапсырды.
Байрам кешеси районлық мәденият бөлими хызметкерлери тәрепинен таярланған йошлы концерт бағдарламасы менен көтериңки руўхта даўам етти.
Адилбай Оразов,
Қарақалпақстан хабар агентлиги шолыўшысы.
