Жаңадан спорт объектлери қурылып, олимпия спорт түрлерин раўажландырыў ушын үлкен илажлар әмелге асырылмақта.
Мысал ретинде, Президентимиздиң арнаўлы қарары тийкарында мәҳәлле жаслары арасында ҳәр жылы өткерилип киятырған «Бес баслама олимпиадасы» шеңбериндеги ғалабалық спорт жарыслары, усы жарысларда жаслардың белсендилиги, бул жарысларда жеңимпаз болған жаслардың мәҳәллелерине үш түрдеги (универсал, стрит-воркоут, воркоут) спорт майданшаларының қурылып берилиўи мәҳәлле турғынларының спорт пенен шуғылланыўы ушын жаратылған және бир шараят, десек болады.
Қарақалпақстанлы жаслар усы күнге шекем бул жарысларда 20 универсал, 19 стрит-воркоут, 21 воркоут майданшасының қурылысын утып алғаны, соның арқасында мәҳәллелердиң инфраструктурасы жақсыланғаны бул пикиримизди тастыйықлайды.
Сондай-ақ, Өзбекстан Республикасы Президентиниң 2023-жыл 25-декабрьдеги «2024-2026-жылларда Өзбекстан Республикасының социаллық ҳәм өндирислик инфраструктурасын раўажландырыў илажлары ҳаққында»ғы қарарына муўапық Қарақалпақстан Республикасында 4 спорт объектинде 52,2 миллиард сумлық қаржы есабынан қурылыс-оңлаў жумысларын әмелге асырыў режелестирилген.
Қарақалпақстан Республикасы Спорт министрлиги тәрепинен Нөкис қаласында әмелге асырылып атырған усындай қурылыс жумыслары менен таныстырыў мақсетинде ғалаба хабар қуралларының ўәкиллери, тараў ветеранлары ҳәм жаслар ушын пресс-тур шөлкемлестирилди.
Илаж қатнасыўшылары дәслеп Тақыятас гүзары МПЖ аймағында қурылып атырған «Гүрес шеберлиги» спорт мектебине алып барылды.
– Бул мектеп ушын ажыратылған 14,2 миллиард сумлық қаржы есабынан исленип атырған қурылыс жумыслары «Маңғыт инвест максимум» ЖШЖ тәрепинен әмелге асырылмақта,-дейди Өзбекстан «Кураш» федерациясы Қарақалпақстан бөлиминиң атқарыўшы директоры С.Жүсипбеков.
Имаратқа қосымша 24х42 өлшемдеги спорт зал, 150 орынлық жатақхана, стадион ҳәм асхана имаратларын қурыў режелестирилген. Бүгинги күнде қаржыландырыў 8 миллиард 501,5 миллион сумды, орынланған жумыслардың көлеми 10 миллиард 595,7 миллион сумды қурайды.
Мақсет – республикамызда спорттың кураш түрин раўажландырыў, алдағы оқыў жылына шекем республикамыздағы қала ҳәм районлардан спорт пенен шуғылланыўға қызығатуғын қәбилетли жасларды таңлап алып, усы спорт түри менен шуғылланыўға тартыў болып есапланады. Олар ушын заманагөй шараятларға ийе 150 орынлық жатақхана, асхана ҳәм басқа да қолайлықлар жаратылады.
Сондай-ақ илаж қатнасыўшылары гимнастиканың заманагөй түрлерине таярлаў орайының қурылыс жумыслары менен танысты.
Президентимиздиң 2022-жыл 23-декабрьдеги «Гимнастика спорт түрлерин және де раўажландырыў илажлары ҳаққында»ғы арнаўлы қарарында Нөкис қаласы, Самарқанд ҳәм Ферғана ўәлаятларында гимнастика спорт түрлерине таярлаў орайларын қурыў белгиленген. Нөкис қаласының Темиржол мәкан пуқаралар жыйыны аймағында январь айында жаңадан Гимнастика спорт түрлерине таярлаў орайының қурылысы басланған еди. Бул жерде де жатақхана, асхана, гимнастика залы толық бой тиклеген екен.
Бул объекттиң қурылысы, оның иске түсирилиўи халық арасында гимнастика спорт түрлериниң, атап айтқанда спорт гимнастикасы, көркем гимнастика, трамполин, акробатика спортының ғалаба ен жайыўына, жаслар арасынан инталы спортшыларды таңлап алыў системасының жетилисиўине тийкар жаратады.
Халықаралық талап ҳәм стандартлар тийкарында профессионал спортшыларды таярлаў арқалы миллий сайланды командамыздың абырайлы жарысларда жоқары нәтийжелерге ерисиўин тәмийинлейди. Мектепке шекемги ҳәм мектеп жасындағы балалардың гимнастика спорт түрлери менен шуғылланыўы ушын кең мүмкиншиликлер жаратылып, оларда бул спорт түрлери бойынша басланғыш көнликпелерди қәлиплестириўге хызмет етеди.
Пресс-тур даўамында қатнкасыўшылар өзлерин қызықтырған сораўларға жуўап алды.
Ә.Жийемуратов,
Қарақалпақстан хабар агентлиги.
